УОК-ын өчигдөрийн хурлаар онцгой нөхцөл байдлын үед авах арга хэмжээний талаар багагүй хэлэлцжээ. Тухайлбал, иргэдийн зээлийн эргэн төлөлтийг хойшлуулах хүсэлт маш ихээр гарч байгаа юм. Энэ асуудлыг албаныхан судалж эхэлсэн байна.
Мөн Сэлэнгэд шинээр илэрсэн халдварын эх үүсвэрийн талаар Шадар сайд Я.Содбаатар "Улаанбаатар болон Сэлэнгэд гарсан тохиолдлууд нэг эх үүсвэртэй юу үгүй юу гэдгийг эцэслэж тогтоогоогүй байна. Бид олон таамаг дэвшүүлээд эхнээс нь мухарлаад явж байгаа. Гэхдээ хоёр голомтот халдварын аль алиных нь ойрын болон дам хавьтлыг тогтоосон. Сэлэнгэд илэрсэн халдвар ХӨСҮТ-ийн сувилагчтай холбоогүй. Сэлэнгийн тохиолдол магадгүй цаанаасаа байхыг үгүйсгэхгүй. Алтанбулагийн боомтоор өдөртөө 40-50 машин орж ирж байна. Хөдөлгөөнийг хязгаарламаар байгаа ч олон улсын худалдааны хэлэлцээрээрээ бас болохгүй байна" хэмээв.
Түүнээс гадна Увс аймагт нэр бүхий иргэдийг тусгаарлаад байгаа юм. Учир нь дотоодод бүртгэгдээд байгаа 7 тохиолдолтой ойрын хавьтал болсон хүмүүс Увс аймагт очсон байжээ. Тиймээс тусгаарлан шинжилгээ авсан байна.
Эх сурвалж: shuurhai.mn Б.ЗАЯА
