Сэлэнгэд шинээр 19 хүний шинжилгээ түргэвчилсэн оношлуураар эерэг гарсан талаар Эрүүл мэндийн яам өнөөдрийн хурлаараа мэдэгдлээ. Гэхдээ энэ бол эцсийн хариулт биш, ХӨСҮТ дээр давтан шинжилгээгээр тогтоогдоно гэв.

Гэвч коронавирусийн халдварын том голомт яалт ч үгүй Сэлэнгэд байна. Тээврийн жолооч Д халдвар авсан мэдээлэл Улаанбаатар хотод батлагдахтай зэрэгцэн Сэлэнгэ аймагт 74 настай иргэн халдвар авсан нь тогтоогдсон билээ. Үүнээс хойш тухайн иргэний гэр бүл, цаашлаад явсан маршрутаар нь хөөж шинжилсээр Дархан-Уул аймагт бас нэгэн шинэ халдвар бүртгэгдлээ. Үүнээс үүдэн Дархан-Уул өнөөдөр тэг зогсолт зарлан бүх нийтээрээ шинжилгээнд хамрагдаж байна. Өнөөдөр нэмэгдэж 19 хүний шинжилгээ эерэг гарлаа.  Ингэснээр Сэлэнгэ бол халдварын хамгийн том голомт болох нь харагдаж байна.

Сэлэнгэд халдвар гараагүй байх үеэс л аймгийн удирдлагууд, Онцгой комиссын зүгээс “Халдвар тархах өндөр эрсдэлтэй байна. Алтанбулагийн хилийн боомтыг хаах шаардлагатай” хэмээн дахин дахин мэдэгдэж байв. Гэвч саяхныг хүртэл албаныхан энэ хүсэлтэд татгалзсаар өчигдөр л хилийн боомтуудыг хаалаа.

Халдвар цааш нэмэгдэх нь тодорхой болж байна. Хэзээ зогсох нь л тодорхойгүй нөхцөл байдал үүсчихлээ дээ.

Эх сурвалж: shuurhai.mn Б.ЗАЯА