УИХ-ын чуулганы нэгдсэн хуралдаан өнөөдөр болж өндөрлөв. Цар тахлын үед болж байгаа учраас чуулганы уур амьсгал энэ чиглэлд чиглэсэн байв.

Чуулганаар яригдсан гол сэдвүүд хатуу хөл хорионд орсон иргэдийн амьжиргаа, ипотекийн зээл, банкны зээлийн хүүг бууруулах тэглэх, ковид 19 вирусийн халдвар улсын хэмжээнд ямар нөхцөл байдалтай байгаа, оношлогоо шинжилгээ хийх тоног төхөөрөмж, эмнэлгийн хэрэгсэл хангалттай эсэх зэрэг хэд, хэдэн сэдвийн дор гишүүд УОК, Монголбанк, Хотын захиргаа зэрэг байгууллагуудын төлөөллөөс асуулт хариултын хүрээнд үргэлжилсэн.

Чуулганы явцад анхаарал татсан дэд сэдвүүд ч байв. Өөрөөр хэлбэл, УИХ-ын зарим гишүүд цаг үеийн нөхцөл байдлаас өөр сэдвээр хэлэлцүүлэг өрнүүлж үзэгч түмний инээлгэж, нөгөө талаар бухимдлыг нь барлаа. Цөөн хэдэн жишээ татъя.

УИХ-ын гишүүн Г.Дамдинням өнөөдрийн халуун сэдэв байлаа. Тэрээр чуулганы хуралдаанд “Би бол УИХ-ын гишүүн хүн. Ордон дээр цуглах ажилтай гээд зар ирсэн. Гэтэл ордон орох замд цагдаа намайг 30 минут зогсоосон. Харилцаа хандлага,  эрүүл аюулгүй байдлын асуудал хангалтгүй байна. Дээрээс өгч  байгаа үүрэг даалгавар газар дээрээ биелж байгаа юу” хэмээн Хууль зүйн сайдад асуулга тавьсан юм. УИХ-ын гишүүний энэ гомдол цаг үеийн нөхцөл байдлаас тэс хөндлөн, халуун цэгт үүрэг гүйцэтгэж байгаа цагдаагийн албан хаагчийг матсан явдал нь олон нийтийн бухимдлыг дээд цэгт нь хүргэж байна.

Гишүүд бүр Шадар сайдаас цар тахлын үеийн эмч ажилчдын хангамж хангалттай байгаа эсэхэд санаа тавьж асуулга асуусан билээ. Тэдний дотор Х.Ганхуяг гишүүний асуулт содон байв. Тэрээр “Цаг үеийн нөхцөл байдал яаж ч мэдэхээр байна. Цаашдын бэлтгэл ажил, төлөвлөсөн зүйл ямар байгаа вэ. Моорог, эмнэлгийн ор зэрэг зүйлс хангалттай байгаа юу” гэх утгатай асуултыг Шадар сайдад тавьсан. Хэдийгээр цаг үеийн нөхцөл байдал эрсдэлтэй байгаа ч монгол хүн байна даа амны билгээс ашдын билэг гэдэг муу зүйлийг орлож ярихаас цээрлэмээр дээ.

Энэ удаагийн чуулганы хуралдаан цахимаар болж өндөрлөсөн. Хуралдааны үеэр зургаа үлдээн босч явсан гишүүнээр Ц.Мөнхцэцэг тодров. Монгол Улсын төрт парламентын гишүүн онцгой цаг үеийн нөхцөл байдлыг хэлэлцэж байсан үед ийн хандсан нь Ц.Мөнхцэцэг гишүүн “сүнс” болж байна хэмээн хошигнох нэгэн байхад олонх нь бухимдав.  Тэрээр энэ үйлдлээ “Хүүхдээ асрах гэж явсан” хэмээн тайлбарлажээ.

Эх сурвалж: shuurhai.mn Б.ЗАЯА