Салхитын мөнгөний ордыг тойрсон дуулиан сүүлийн гурван жил тасралтгүй үргэлжлэв. БНХАУ-ын нэр бүхий иргэд энэ ордод эзэн сууж шүүхээр эзэмшигчээ тогтоолгох маргаанд Монголын шүүх, хуулийн байгууллагынхан гар бие оролцож багагүй асуудал үүссэн. Тодруулбал, гурван шатны шүүхийн нэр бүхий 10 гаруй шүүгч дээрх асуудлыг БНХАУ-ын иргэдийн талд шийдвэрлэж өгөхөөр авлига авсан нь тогтоогдож хэдэн сар үргэлжилсэн мөрдөн байцаалт, шүүх ажиллагааны эцэст эхнээсээ хариуцлагаа хүлээж эхлээд байгаа билээ.
Тэгвэл нөгөө талд УИХ-ын дарга Г.Занданшатар өнгөрсөн жил тагнуул, хүчний байгууллагын хүчээр Салхитын мөнгөний орд дээр очиж ажиллагаа явуулж ордын үйл ажиллагааг битүүмжлэн төрийн мэдэлд авсан юм. Ингэснээр тус ордыг төрийн мэдлийн Эрдэнэс Монгол компанийн харьяа Эрдэнэс силвер ресурс компанид эзэмшүүлсэн. Ингэснээр энэ ордын асуудал дууссан гэсэн үг биш юм.
Салхитын мөнгөний ордыг төр өөрийн мэдэлд авсантай холбогдуулан Салхитын уурхайн агуулахад хадгалагдаж байсан тоног төхөөрөмжийн өмчлөгчийг тогтоох асуудал бас үүсээд байв. Нийслэлийн прокурорын газраас энэ хэрэг дээр төрийн өмнөөс нэхэмжлэгчээр оролцож Иргэний хэргийн шүүхэд ханджээ. Шүүхээс прокурорын тайлбарын дагуу 135 тэрбум төгрөгийн үнэ бүхий байгалийн баялаг, хөрөнгийг хариуцагч талаас төрийн мэдэлд шилжүүлэн авчээ. Ингэснээр Салхитын ордтой холбоотой маргаан өндөрлөж байгаа бололтой.
Эх сурвалж: shuurhai.mn Г.ОЧИР