Дархан-Уул аймагт COVID-19 халдварын голомтыг хумьж чадсанаар өнөөдрөөс эхлэн тэг зогсолтыг цуцалж байгаагаа мэдэгдсэн билээ. Өчигдрийн байдлаар тус аймагт халдварын шинэ тохиолдол гараагүй байна. Гэвч энэ нь дахин халдвар гарахгүй гэсэн үг биш юм.
Энэ талаар албаныхан ч онцолж байна. ЭМЯ-ны хэлтсийн дарга Д.Нарангэрэл "Дархан-Уул аймагт халдвар дамжин тархах эрсдэлийг бууруулах арга хэмжээ нь үр дүнтэй байгаа гэж бид үзэж байгаа. Түүнээс биш Дархан-Уул аймагт гарсан голомтыг бүр таслан зогсоосон гэж мэргэжлийн хүний хувьд хэлэхгүй. Голомтын нарийн тандалт судалгаа цааш үргэлжилдэг. Тиймээс Дархан-Уул аймагт одоогоор зөвхөн халдвар тархах эрсдэлийг л бууруулсан гэж үзэж буй" гэсэн юм.
Коронавируст халдварын нууц үеийн хугацаа 14 хоног байдаг. Тиймээс хамгийн сүүлийн тохиолдол бүртгэгдсэнээс хойш 14 хоногийн хугацаанд халдвар дахин гарах эрсдэлтэй. Голомтыг цомхтгон дарна гэдэг нь шинэ халдвар гарснаас хойш 14 хоног ажиглаж, дахин 14 хоногийн дараа буюу нийт 28 хоногийн дараа дахин халдвар гарахгүй бол хяналтдаа бүрэн авлаа гэж олон улсад үздэг ажээ.
Эх сурвалж: shuurhai.mn Г.ОЧИР
