Монгол Улс шинэ төрлийн коронавирусийн халдвартай эрчимтэй тэмцэж байна.
БНХАУ-д халдвар анх тархаж эхэлснээс хойш 10 гаруй сарын хугацаанд манай улс дотоодод халдвар алдаагүй билээ. Халдвар тархсан улс орнуудаас иргэдээ зөөвөрлөн авчрах ажиллагааны үеэр 2020 оны 11 дүгээр сарын 8 хүртэл 362 тохиолдол гаднаас зөөвөрлөгдөөд байв.
Гэвч энэ өдөр дотоодод халдвар алдагдаж ОХУ-аас ирсэн тээврийн жолооч 21 хоног тусгаарлагдаад гэртээ гарсны дараа халдвартай нь батлагдсан. Энэ өдрөөс хойш өнөөдрийг хүртэл яг 15 хонож байна. ЭМЯ-ны өнөөдрийн 11:00 цагийн мэдээллээр Монгол Улсад нийт халдварын тоо 640 болсныг зарлалаа. 10 сарын хугацаанд 362 тохиолдлыг бүртгээд байсан бол хагас сарын дотор энэ тоо 2 дахин нэмэгдлээ.
Дотоодод алдагдсан халдварын тархалт ямар хурдтай, хор хөнөөлтэй байгаа нь үүнээс харагдаж байгаа юм.
Тиймээс иргэд та бүхэн өндөржүүлсэн бэлэн байдлын нөхцөлд өөрийгөө болон гэр бүлийнхээ эрүүл мэнд, амь насыг хамгаалан дүрэм журмыг сайтар мөрдөөрэй.
Эх сурвалж: shuurhai.mn Г.ОЧИР
