Нийслэлийн эрүүгийн давж заалдах шатны шүүх 2020 оны 10 дугаар сарын 29-нд бусдын мэдээллийн сүлжээнд хууль бусаар нэвтэрсэн, компьютерийн системд санаатайгаар хууль бусаар мэдээлэл дамжуулсан хэргийг хянан хэлэлцжээ.

Уг хэргийн оролцогч, шүүгдэгч нь шүүгч, хэргийн үндэслэл нь Монголын томоохон улстөрчидтэй холбоотой байгаа нь анхаарал татна. Өөрөөр хэлбэл, Монголын шүүх ажиллагаанд нэр нөлөө бүхий, томоохон улстөрчид, албан тушаалтнуудын нөлөөлөл байдгийг баталсан хэрэг. Тиймээс тус хэргийн шүүхийн шийдвэрээс оролцогчдын мэдүүлгээс хэсэгчлэн сонирхуулъя.

Уг хэрэг нь С.Б, Ц.З гэх хоёр хүнд холбогдсон гэмт хэрэг. Тэднийг бүлэглэж мэдээллийн сүлжээнд хууль бусаар нэвтэрсэн, компьютерийн системд санаатайгаар хууль бусаар мэдээлэл дамжуулсан гэж анхан шатны шүүх үзэж ял оноосон юм байна. Хэргийг товч сийрүүлбэл, С.Б /Чингэлтэй дүүргийн Эрүүгийн хэргийн анхан шатны шүүхийн шүүгч/, Ц.З /хувиараа барилгын ажил хийдэг/ хоёр бүлэглэн 2018 оны 5 дугаар сарын 17-ны өдөр Баянгол дүүргийн 13 дугаар хороо И март худалдааны төвд байрлах Мобиком үүрэн холбооны салбарт Б.Мөнхбаярын /шүүгч/ иргэний үнэмлэхийн хуулбарыг ашиглан 9919.... дугаарын эрхийг хууль бусаар сэргээлгэн Мобиком корпорацийн өмчлөлийн, Б.Мөнхбаярын эзэмшиж байсан 9919.... дугаартай цахим төхөөрөмжид нэвтэрч, Б.Мөнхбаярын мэдээллийн сүлжээнд хууль бусаар халдаж 9919.... дугаарын сүлжээг ашиглах боломжгүй болгосон, хэвийн үйл ажиллагааг алдагдуулсан, мэдээллийн сүлжээнд хууль бусаар нэвтэрсэн, компьютерийн системд санаатайгаар хууль бусаар мэдээлэл дамжуулсан гэмт хэргийг зохион байгуулж хамтран оролцсон гэж буруутгажээ.

Шүүгдэгч С.Б-гийн шүүхэд гаргасан мэдүүлгийг хүргэе.

Шүүгдэгч С.Б /шүүгч/: ....2018 оны 5 дугаар сарын 1-ний өдөр 12:51 цагийн үед намайг яллагдагч С.Баярцогтын цагдан хорих шүүх хуралдааныг хийж байх үед Б.Мөнхбаяр шүүгч өөрийнхөө 9919... дугаарын утаснаас миний утас руу “Юу нь 15 хоног вэ” гэж зурвас бичсэн болно. Уг зурвас ямар утгатай зурвас байсан гэхээр шүүх хуралдаан болохоос өмнө 5 минутын өмнө

Б.Мөнхбаяр /шүүгч/ намайг өөрийнхөө өрөөнд дуудаж уулзаад “С.Баярцогтод авсан цагдан хорих таслан сэргийлэх арга хэмжээг өөрчилж гаргаарай, дээрээс том ярьж байна, прокурорууд 30 хоногийн хугацаанд юу ч хийгээгүй юм шиг байна лээ шүү” гэж хэлэхэд би хууль тогтоомжид заасны дагуу Ерөнхий шүүгч Б.Мөнхбаярын нөлөөнд үл автаж С.Баярцогтыг 15 хоногийн хугацаагаар цагдан хорих таслан сэргийлэх арга хэмжээг авсан.

Ингээд хурлын дараа Ерөнхий шүүгч Б.Мөнхбаяр миний өрөөнд орж ирээд “чи яагаад 15 хоног хорьчихвоо гэж уурлаад би чамд дээрээс том яриад байна гэж хэлээд байхад “хорьчих юм аа, араа өөрөө даагаарай” гэж хэлээд миний өрөөнөөс гараад явсан. 

Дараа нь 2018 оны 5 дугаар сарын 10-ны өдрийн өглөө 10 цаг 00 минутад Б.Мөнхбаяр өөрийнхөө 99190099 дугаарын утаснаас миний эзэмшлийн 99194429 дугаарын утас руу “Том ярьж байна, хэвээрээ” гэж зурвас бичсэн. Энэ зурвас ямар утгатай гэхээр С.Баяр, Ч.Сайханбилэг нарыг цагдан хорих шүүх хуралдаан болохын 10 минутын өмнө Б.Мөнхбаяр дуудаад “за Батжаргалаа том ярьж байна, одоо наад хоёроо гаргаарай, чи өмнө гарга гэхэд С.Баярцогтыг гаргаагүй 15 хоног хорьсон, түүнээс болж би том/Ц.Зориг дарга/-д загнуулсан, одоо хэрвээ гаргахгүй бол чи бид хоёр ажилгүй болно шүү” гэж хэлээд миний хажууд утсаар хэн нэгэн хүнтэй “viber”-аар яриад “өчигдрийн ярьсан зүйл хэвээрээ биз дээ” гээд утсаа салгасан.

Ингээд надад хэлэхдээ “би сая чиний хажууд томтой ярилаа, том хэвээрээ гэж байна, тийм учраас гаргаарай, харин таслан сэргийлэх арга хэмжээг нь гадагш явахгүй байх таслан сэргийлэх арга хэмжээ аваарай” гэж хэлсэн. Ингээд намайг хуралд орсны дараа миний утас руу дээрх зурвас буюу надад ярьж байсан зүйлээ бататгах гэж юм уу, эсвэл өөрөө ямар нэг баримттай үлдэх гэсэн юм уу “Том ярьж байна, хэвээрэй” гэсэн зурвасыг миний утас руу бичсэн.

Би бодохдоо шүүгч Б.Мөнхбаяр нь “яллагдагч С.Баярцогт, Ч.Сайханбилэг, С.Баяр нарын цагдан хорих шүүх хуралдаанаас гаргасан шийдвэрээс болж, хэн нэгэн хүний итгэлийг алдаж, эсвэл загнуулснаас болж над руу бичсэн 2 удаагийн зурвас “далдлах” зорилгоор энэ үйлдийг хийсэн юм болов уу” гэж бодож байна.

Миний хувьд би энэ үйлдлийг хийх ямар ч шалтаг, шалтгаан, зорилго байхгүй, мөрдөн байцаалтын шатанд ч тогтоогоогүй, хэрвээ энэ Б.Мөнхбаярын сим картыг сэргээсэн үйлдэл нь 2018 оны 5 дугаар сарын 1-ний өдөр, 2018 оны 5 дугаар сарын 10-ны өдрүүдээс өмнө буюу С.Баяр, Ч.Сайханбилэг, С.Баярцогт нарын цагдан хорих шүүх хуралдаанаас өмнө үйлдэгдсэн бол намайг харин Б.Мөнхбаярын сим картыг сэргээлгээд өөр рүүгээ зурвас бичээд С.Баяр, Ч.Сайханбилэг, С.Баярцогт нарыг гаргачихсан байна лээ гэхэд бүрэн хардах үндэслэл болох байжээ... гэжээ.

Тус хэрэгт хоёр шүүгдэгчид 6 сая төгрөгийн торгох ялыг оногдуулсан байдаг юм. Давж заалдах шатны шүүх анхан шатны шүүхийн шийдвэрийг хэвээр баталсан байдаг.

Хамгийн гол нь хоёр хүн бүлэглэн нэг хүний мэдээлэлд хууль бусаар халдсан гэх жижиг төрлийн цахим гэмт хэрэг мэт харагдаж байгаа боловч хэргийн үндэслэл, оролцогчид нь анхаарал татаж байгаа юм. Оролцогчийн нэг нь шүүгч, хохирогч нь шүүгч. Хэргийн үндэслэл нь албан тушаалын гэмт хэрэгт буруутгагдан шүүгдэж байгаа Монголын томоохон улстөрчид болох С.Баярцогт, Ч.Сайханбилэг, С.Баяр нарын хэргийг шийдвэрлэж байгаа шүүгчдийн шүүн таслах ажиллагаатай холбоотой байна. Үүнээс Монголын шүүх байгууллагын ажиллагаанд бусдын нөлөөлөл ийм хэлбэрээр ордог байх нь гэсэн үндэслэл харагдаж байгааг нуух юун.

Эх сурвалж: shuurhai.mn Г.ОЧИР