Цар тахлын тархалт өдөр бүр нэмэгдэж, хяналтдаа авч чадахгүй байгаа ОХУ COVID-19-ийн эсрэг вакцинжуулалтыг өчигдөр Москва хотоос эхлүүллээ. Ингэснээр иргэдээ вакцинд хамруулж эхэлсэн дэлхийн анхны улс болов. Тэд наймдугаар сард баталгаажуулсан дэлхийн анхны коронавирусын эсрэг вакцин болох “Sputnik V”-д иргэдээ хамруулж эхэлсэн байна. Вакциныг туршиж байгаа эрдэмтэд 95 хувийн үр дүнтэй, сайн дурын ажилчдад сөрөг нөлөө үзүүлээгүй тул бүх нийтийг хамруулж эхэлж байна гэж ярьжээ. Москва хотын захирагч Сергей Собянин “Сургуулийн ажилчид, эрүүл мэндийн мэргэжилтнүүд, нийгмийн ажилтан гэсэн 13 сая хүнийг энэ долоо хоногийн эхээр вакцинд хамруулна. Дээрх салбарын 18-60 насны хүмүүс цахимаар бүртгүүлж, Москва хотод нээсэн 70 гаруй цэгт очиж 08:00-20:00 цаг хүртэл вакциндаа хамрагдах боломжтой” гэдгийг зарласан юм. Олон мянган хүн вакциндаа хамрагдаж эхэлсэн ч хэдэн хүнийг хамруулах нь вакцины үйлдвэрлэлийн хүчин чадлаас хамаарах учир тоо нь тодорхойгүй байна. Гэхдээ энэ оны сүүлээр гэхэд хоёр сая тунг үйлдвэрлэх боломжтой гэж таамаглаж буй юм. Нэг хүн 21 хоногийн зайтай хоёр тун вакцин тариулна.
Мөн Их Британи энэ долоо хоногоос коронавирусын эсрэг вакцинжуулалтаа эхлүүлнэ хэмээн тус улсын Ерөнхий сайд Борис Жонсон лхагва гаригт зарласан. Ингэснээр цар тахлын эсрэг вакциныг хэрэглээнд нэвтрүүлэх зөвшөөрөл олгосон барууны анхны орон болсон юм. Их Британийн Засгийн газар АНУ-ын “Pfizer”, Германы “BioNTech” компанийн хамтран бүтээсэн COVID-19-ийн эсрэг 92 хувийн үр дүн үзүүлсэн вакцинд зөвшөөрөл олгосон юм. “Вакцины тусламжтайгаар ирэх хавар гэхэд хэвийн амьдралдаа шилжинэ гэдэгтээ итгэл дүүрэн байгаа тул 40 тун вакцин захиалсан. Энэ долоо хоногт 800 мянган тунг нь хүлээн авч, иргэдээ хамруулж эхэлнэ” хэмээн Борис Жонсон мэдэгдээд байгаа юм. Мөн Британийн Эм, эмнэлгийн хэрэгсэл, эрүүл мэндийн бүтээгдэхүүний хяналтын агентлаг вакцины үйлдвэрлэлийн явцыг хянаж байсан тул сөрөг нөлөөнд санаа зовнихгүй байгаагаа мэдэгдсэн. Энэ вакциныг нэг хүн 21 хоногийн зайтай хоёр тунг тариулна. Хадгалах хугацааны хувьд эмнэлгийн хөргүүрт 2-8 хэмд таваас дээш хоногоор хадгалах боломжтой юм байна.
Тус улсын Вакцин, дархлаажуулалтын нэгдсэн хорооноос эхний ээлжинд ахмад настан, хүнд өвчтэй эмзэг бүлгийн 75 мянган иргэнээ вакцинд хамруулбал цар тахлын нас баралтаас 99 хувь хүртэл урьдчилан сэргийлэх боломжтой гэж үзжээ. Тиймээс энэ долоо хоногт 80-аас дээш насны болон гэрийн асаргаанд байдаг хүмүүсээ хамруулах юм.
Эх сурвалж: “Зууны мэдээ” сонин
