Монгол Улс шинэ төрлийн коронавирусийн эсрэг амжилттай тэмцэж байна. Дэлхийн улс орнуудаас хамгийн бага өвчлөлтэй, бага хохиролтой байгааг ДЭМБ төдийгүй олон улс сайшаан магтаж байгааг нийтлэлийн эхэнд онцолъё.
Шинэ төрлийн коронавирус бол цар тахал. Цар тахлын эсрэг ямар улс орны төр засаг ард түмний дунд хөл хорио тогтоож байж барьж авдаг. Үүний адилаар Монгол Улс 2020 оны 11 дүгээр сарын 11-нээс эхлэн нийслэл Улаанбаатар хотын хэмжээнд хөл хорио тогтоосон. Хатуу хөл хориог 14 хоногийн хугацаанд үргэлжлүүлэн шатлал бууруулан хөл хориог тавьж байгаа.
Хөл хорио тогтоосноос хойш 1 сар ч болоогүй байна. Өнгөрсөн 20 гаруйхан хоногт “Монголчууд үхлээ, хатлаа”, огцруул, хал гэсэн уриа лоозонг хэсэг хүмүүс л олон нийтийн сүлжээнд оруулж турхирч харагдана. Нийтийн эрх ашгийн төлөө нэг хэсгийн эрх ашиг зөрчигдөх нь жам.
Өөрийн болон гэр бүлийнхээ, хайртай хүмүүсийнхээ эрүүл мэндийг бодож байгаа хүмүүс тэргүүн фронтод ажиллаж байгаа хүмүүсийн заавар зөвлөмжийг даган үүргээ биелүүлсээр байгаа.
Халдварын нөхцөл байдлын улмаас энэ сарын 1-нд хөл хориог 10 хоногоор сунгасан билээ. Сунгасан хугацаа дуусах болоогүй байна. Хугацаа сунгаад дөнгөж 7 л хонож байна. Гэвч хөл хорионы хугацааг дахин сунгах нь гэсэн мэдээлэл энд тэндгүй харагдах боллоо. Холбогдох төрийн байгууллагууд ийм санал гаргаагүй гэдгээ зарлаж байна. Өнөөдөр л гэхэд Эрүүл мэндийн яам УОК-д сунгах санал хүргэлээ гэсэн мэдээлэл тархсан. Гэвч дөнгөж саяхан Эрүүл мэндийн сайд Т.Мөнхсайхан энэ мэдээллийг няцаажээ. Дэлхийг нөмөрсөн цар тахлын нөхцөл байдал үлдсэн хэд хоногт яаж ч эргэхийг таашгүй. УОК болон НОК хөл хориог 10 хоногоор сунгахдаа “Нэмж халдварын голомт гарахгүй бол хөл хориог цуцална” гэж мэдэгдэж байсан. Одоогоор халдварын голомт нэмэгдээгүй байна.
Гэвч бодит байдлын эсрэг олон нийтийг турхирах байдал гарсаар л байна. Ийм сонирхол хэнд байдаг вэ. Мэдээж цар тахлын эсрэг, өвчинд санаа зовсон, гэр бүлээ хамгаалсан, өөрийгөө хамгаалсан хүнд бус өчүүхэн эрх ашгийн төлөөх хүмүүст л байдаг. Ялангуяа сандал суудал, албан тушаалын төлөөх ашиг сонирхолд байдаг.
Эцсийн дүндээ цөөнх эрх ашгаа хамгаалахын төлөөх тэмцлийн хор уршиг юунд ч хүргэж мэдэх билээ.
Эх сурвалж: shuurhai.mn Г.ОЧИР
