Хотын даргыг огцруулах тухай яриа бодитой юу
У. Оргилмаа
Хотын дарга Д.Сумъяабазарыг огцруулах тухай яриа, түүнийг Ерөнхий сайд, намынхаа удирдлагуудтай зөрчилдөж эхэлсэн гэх цуурхлыг цар тахал дундуур “зүтгүүлж” эхэллээ. Дэлхийн хэмжээний цар тахалтай тэмцэж, Ерөнхий сайдын сүржигнэж хэлснээр “бүслэлтэд сэтлэхээр гардан тулаан хийж” буй нөхцөлд улс төрийн зорилготой энэ мэт “хар хүч” бактерлогийн зэвсгээс дутуугүй хорлонтой.
Бодит нөхцөл байдал дээр Ерөнхий сайд, МАН-ын дарга У.Хүрэлсүх, хотын дарга Д.Сумъяабазар нар өнгөрсөн даваа гарагт л гэхэд бүтэн оройжин толгой сээрээрээ хэлхэлдэн сууж өнөөх “гардан тулааны төлөвлөгөө”-гөө хийж суусан гэдгийг батлах хүн цөөнгүй байв. Мөн эрх баригч намын генсек Д.Амарбаясгалан, Шадар сайд, УОК-ын дарга Я.Содбаатар нартай муудалцуулах сөрөг тактик болгоныг ор үндэсгүй, улс төрийн хэмлэлдээн гэж харж болохоор байна.
Дэлхийн хэмжээний цар тахал “хулганын сүүлээр” Монголыг шарваж иргэдээ эрүүл, эсэн мэнд, ард түмний амьжиргааг бүрэн бүтэн, аж ахуйн нэгжүүдийг хаалгыг нь бариулж дансыг нь хаалгалгүй авч үлдэхийн төлөө чадах бүхнээ хийж буй энэ цаг үед улс төрийн шалтгаантай цуурхал бүхнийг няцаах зав тэдэнд алга.
Харин орон зай, цаг хугацааны хувьд хэн, хаана, хэнтэй юу ярив гэдэг бодит мэдээлэлд тулгуурлаж харахыг хүсвэл МАН-ынхны эвдрэлцэж суух цаг биш. Харамсалтай нь албан тушаалын хэнээрхэл, атаа жөтөө гэдэг байхгүйг бий болгож, хөл хоривч хэл хорих биш гээд хов базаж суугаа хэсэг бүлэг хүмүүсийн хувьд гар утасны хэдхэн товчлуураар гай тарьж чадахаар хүч багаддаггүй аж.
Гэвч энэ бол тэс өөр цаг үе. Наадмын өмнө У.Хүрэлсүхийг Д.Сумъяабазартай “зодолдуулж”, наадмын дараа хотын удирдлагын асуудлаар Д.Амарбаясгалантай “дайтуулаад” байснаас хойш Ковидын аюул Монголыг нөмөрч халдвар авсан иргэний тоо нэг мянга руу дөхөж байна.
Хотын даргын шийдвэрүүд Засгийн газар, УОК-ын удаа дараа өөрчлөгдөж, бухимдал төрүүлж, доог тохуу болсон нь үнэн. УОК, Засгийн газар хайхрамжгүй, хариуцлагагүй, хардалт төрүүлсэн “Энхсаран”-гийн эзэдтэй хатуухан ярьж чадахгүй байгаа нь ч үнэн. Хариуцлага тооцох, дараагийн зөв “маневр” хийх нь одоо хийж байгаа болон хийх гэж буй ажилтай зэрэг явах учиртай.
Архи, пиво нэхэх, автобус унаагаар зорчих зэргээр анх удаа ийм тахалтай тулалдаж байгаагийн хувьд алдаа дутагдал гарсан байж болох ч үүнийг улстөржүүлж албан тушаалын томилгоо хийж, Засгийн газраа сольж суух үе яавч биш. Энгийнээр бодоход ямар тархи нь гашилсан Ерөнхий сайд, намын дарга хөл хорио сунгах эсэхтэй зэрэгцэн хүн амынхаа талаас илүү хувь нь оршин суугаа хотын даргыг ийм цаг үед солих гээд сууж байх вэ дээ.
Магадгүй, түүний амнаас “хариуцлага” гэдэг үг унахад өлгөж авч, Хотын даргын “газрын наймааны асуудлыг цэгцэлнэ” гэсэн зэргээс үүдэж хэмлэлдүүлэх хүслээр хольж хутган логик зохиосон явуургүй арга биз. Гэвч өнөөдөр олон нийтэд хамгийн сонирхолгүй, утгагүй үзүүлбэр бол улс төр болчихоод байна.
...Ерөнхий сайд, МАН-ын дарга өнөөдөр цаасан мөнгө хэвлэхгүйгээр цар тахлыг дарахын төлөө зүтгэж байна. Цаагуур нь “өрх бүрт мөнгө тараа” гэх мэт Ерөнхийлөгчийн сонгуульд бэлтгэсэн догшин популизм яваад л байгааг иргэд харж байна. Сайхан санаа, гоё үг бүхэн сайн зүйл биш. Харамласандаа биш боломжгүйдээ тэр сайхан хүсэл хязгаарлалтад орсон болохоос энэ дунд улс төр “гүйлгэх” ёсгүй...
Өнөөдрийн өдрүүдэд амьд байх, эрүүл байх, гэр бүлээ халдвараас хамгаалах л хамгийн үнэт зүйл болчихоод байгааг саруул ухаантай хүн бүр мэдэрч байна. Дулаан гэр, эрүүл хоол, халдварыг эсэргүүцэх дархлаа хамгаас үнэтэй байхад түүнээс тэс өөр төрлийн шуналтай, ашиг сонирхолтой, улс төрийн цуурхлаар голоо зогоож тархины өлсөлтөө тэжээж суугаа бол улстөрч байтугай “Хүн гэдэг нэр хүндэднэ” гэгч болж байгаа нь тэр! Бидний хандлага зөв байж, эв эеэ хичээж гэмээнэ тахлын аюулыг давна.
Өнөөдөр жил бүр хориод тэрбум төгрөг татварт тушаадаг боловч тахлыг давахад 100 сая төгрөгийн хандив өргөж буй компани руу, банк руу, амны хаалт, амьсгалын аппарат, оношлуур, шахмал түлш чадах ядахаараа нэмэрлэж буй хүмүүс рүү дайрч доромжлохыг харахад бидний оюун санааны дархлаа хэдийнэ суларч вирустжээ гэдгийг мэдэрч байна.
Хэрэв энэ тахлын вирусийг хаа газрын нэг орноос хамгийн сайн вакциныг олж ирээд тэмцэж болох бол улстөржсөн вирусийн эсрэг тэмцэх хамгийн сайн вакцин бол эв нэгдэл юм. Тиймээс Ерөнхий сайдыг Ерөнхийлөгчтэй, Хотын даргыг Намын дарга нартай, Ерөнхий сайдыг Хотын даргаа огцруулна гэхчлэн солиорсон цуурхлуудаа болих хэрэгтэй.
Ерөнхий сайд, МАН-ын дарга өнөөдөр цаасан мөнгө хэвлэхгүйгээр цар тахлыг дарахын төлөө зүтгэж байна. Цаагуур нь “өрх бүрт мөнгө тараа” гэх мэт Ерөнхийлөгчийн сонгуульд бэлтгэсэн догшин популизм яваад л байгааг иргэд харж байна. Сайхан санаа, гоё үг бүхэн сайн зүйл биш. Харамласандаа биш боломжгүйдээ тэр сайхан хүсэл хязгаарлалтад орсон болохоос энэ дунд улс төр “гүйлгэх” ёсгүй.
Энэ талаар улстөржөөгүй учраас ч Ерөнхийлөгчийн ирүүлсэн саналыг бодлого төлөвлөгөөндөө шингээж өвс тэжээл, бүх төрлийн хүнсний будаа, элсэн чихэр, ургамлын тос зэрэг бүтээгдэхүүнийг гаалийн албан татвараас чөлөөлж сайшруулсан түлшний үнийг 50 хувиар хямдрууллаа.
Өөрөөр хэлбэл, өрх бүрийн хаалгаар орох бодитой арга хэмжээ яах аргагүй мөн. Эцэст нь хэлэхэд эхлээд цар тахлыг мэнд давцгаая. Дараа нь хэнийг ч хэнээр сольж, “зодолдуулж”, “хэмлэлдүүлж” амжина. Гагцхүү энэ бүхний цаг хугацаа нь одоо биш!
