МҮОНРТВ-ийн Үндэсний зөвлөлд нэр дэвшсэн нэр бүхий нэр дэвшигчдийг эсэргүүцэж тус телевизийн ажилтнууд өчигдрөөс эхлэн суулт зарласан юм.
Өнөөдөр өглөө цагдаагийн байгууллагаас сэтгүүлч Б.Пүрэв тэргүүтэй хэд хэдэн ажилтныг баривчлан авч явсан юм. Чингэлтэй дүүргийн цагдаагийн хэлтэс дээр сэтгүүлчдийг аваачин 2 байцаалт авсны эцэст суллажээ.
Сэтгүүлч Б.Пүрэв сэтгүүлчид эсэргүүцэл илэрхийлсэн шалтгааныг өөрийн сүлжээндээ тайлбарлахдаа “Хуулийг, ёс зүйг, хүн чанарыг хог новш болгож, иргэн бүрийн өмч MNB-г хувийн фэйсбүүк хаяг шигээ санаж, улс төрийн бохирын хоолой болгож, мөнгө угаах машин болгож байгаа бүлэглэлтэй, тэр бүлэглэлийг төрүүлээд байгаа тогтолцоотой тэмцээд хоёр сар гаран боллоо. Гэтэл тоглоом хийж бга юм шиг манай төр бидний тэмцэж буй бүлэглэлд хариуцлага тооцох биш харин ч бүр дээр минь залах гээд байгаа учир хар шөнөөр ингээд гэр барих гээд явна. Бидний шударга ёсны төлөөх тэмцлийг Ерөнхий сайд, Их хурал, Эрх баригч нам дэмжээд байна гэж бодсон нь худлаа болж байна уу даа. Маргаашийн УИХ-ын хуралдааны шийдвэрийг харах л үлдлээ. Захирлуудын зөвлөл огцор, Үндэсний зөвлөл огцор, Олон нийтийн радио телевизийн тухай хуулиа шинэчил гэсэн шат дараатай тэмцэл билээ. Энэ байгууллага таны, миний, бидний үр хүүхдийн ирээдүйд өвлөгдөх өмч юм” гэжээ.
Эх сурвалж: shuurhai.mn Г.ОЧИР
