УИХ-ын чуулганы нэгдсэн хуралдаан эхэллээ. Өнөөдрийн хуралдаанаар “Монгол Улсын хууль тогтоомжийг 2024 он хүртэл боловсронгуй болгох үндсэн чиглэл батлах тухай” Улсын Их Хурлын тогтоолын төслийг хэлэлцэж байна.
Хуулийн төслийг УИХ-ын гишүүн, ХЗДХ-ийн сайд Х.Нямбаатар танилцуулав. Хэлэлцэж буй асуудалтай холбогдуулан гишүүд асуулт асуулаа.
УИХ-ын гишүүн Ё.Баатарбилэг "Батлагдан гарч байгаа хуулиуд хэр сайн боловсрогдож гарч байгаа вэ. Судалгаа байна уу. Батлагдан гарсаныхаа дараа удаагүй нэмэлт өөрчлөлт оруулахаар орж ирээд байдаг. Тэгэхээр үүнд хэр анхаарч байгаа вэ. Мөн дахиад нэг асуулт байна.
Боловсролын зээлийн сан дээр байгаа дотоодын их дээд сургуульд, хөнгөлөлттэй буцалтгүй, сурч байгаа 10 гаруй мянган оюутны диплом нам дарагдчихсан байна. Тогтоолын төслөөр нөхөж олгоно. Гэтэл өнгөрсөн хавар тогтоолын төсөл оруулж ирээд хэлэлцэх гэсэн боловч улстөржүүлээд шүүмжлээд хэлэлцэхгүй байсаар байгаад болиулсан. Хууль тогтоомжийн хэрэгжилтийн судалгаа байна уу"
УИХ-ын гишүүн, ХЗДХ-ийн сайд Х.Нямбаатар "2017 оноос хойш хууль тогтоомжийн хуулийн хүрээнд хууль санаачлах эрх бүхий субьектууд хууль санаачлах үүрэг хүлээсэн. Үүнээс хойш харьцангүй судалгаа тооцоотой орж ирдэг болсон. Нэг шат ахисан. Өнөөдөр хэлэлцэж буй асуудалтай холбогдуулан бодлогын хүрээнд 2021 онд эрхзүйн шинэтгэл 2 гэсэн том бодлогын баримт бичгийг УИХ-аар хэлэлцүүлж батлуулах төлөвлөгөөтэй ажиллаж байна. Хууль тогтоомжийн хэрэгжилт хэрэгжиж байгаа эсэхэд судалгааны ажлууд бий. Бид хууль тогтоомжийг батлан гаргахдаа нэг алдаа гаргаад байна. Ямар ч хууль батлагдан гарахдаа өөрөө хэрэгжих эдийн засгийн баталгаатай хууль батлагдах ёстой. Харамсалтай нь, төсөв санхүү, батлагдаж байгаа хууль хоёр хоорондоо уялдаагүйн улмаас хууль тогтоомжийн хэрэгжилтэд хүндрэл гарч байна гэсэн дүгнэлтэд хүрч байгаа" гэлээ. Чуулганы хуралдаан үргэлжилж байна.
