Засгийн газрын шийдвэрээр улс даяар айл өрх, аж ахуйн нэгжүүдийн цахилгааны үнийг 2021 оны 7 дугаар сарын 1 хүртэл тэглэхээр болсон билээ. Энэ шийдвэртэй холбогдуулан цахилгаан эрчим хүчний эх үүсвэр дутагдах эрсдэлтэй байгаа талаар мэдээлэл гараад байгаа юм.

Энэ асуудлаар өнөөдөр Эрчим хүчний зохицуулах хорооны дарга А.Тлейхан мэдээлэл өглөө.

Тэрээр мэдээлэлдээ “Засгийн газраас шийдвэр гарсантай холбоотойгоор гэр хороололд цахилгааны ачаалал хамгийн их байна. Учир нь гэр хорооллын айлууд дулаанаа хангахын тулд олон халаагуур залгаж байна. Энэ нь эрчим хүчний ачаалалд нөлөөлж байгаа юм. Харин орон сууцанд харьцангуй тогтвортой байгаа. Тиймээс тогны хязгаарлалт хийлгэхгүйн тулд иргэдийг илүү хэрэглээ битгий гаргаарай гэж хүсмээр байна. Ялангуяа 17:00-21:00 цагийн хооронд ачаалал их байна. 

Монгол Улс ОХУ-аас жилд 350 орчим сая квт эрчим хүч авч байгаа. Нэг квт цахилгааныг 243 төгрөг орчмоор авдаг. ОХУ-аас авч буй цахилгааны ихэнх нь төвийн бүс, зарим хэсэг нь баруун бүс рүү хуваарилагддаг. Харин БНХАУ-аас жилд 1 тэрбум гаруй квт цахилгааныг авдаг. Энэ нь Оюу-Толгойн үйл ажиллагаанд хэрэглэгддэг. ОХУ-аас бид хамгийн ихдээ 245 мегаватт ачаалал авах боломжтой. Өчигдөр орой гэхэд 233 мегаватт ачаалал гарсан.

Засгийн газрын шийдвэр гарсан өдөр гэхэд л цахилгааны хэрэглээ 18 хувиар нэмэгдсэн. Хэрэглээ огцом өсвөл хязгаарлалтад орж болзошгүй. Бид хоёр сарын хугацаанд л хэвийн ажиллачихвал хүйтний эрч суларч, дулаарна. Тэр болтол бүгдээрээ хамтарч ажиллая. Ачаалал нэмэгдэхгүй бол мэдээж хязгаарлалт хийхгүй. Харин огцом нэмэгдвэл хязгаарлахаас өөр аргагүй” гэлээ.

Эх сурвалж: shuurhai.mn Г.ОЧИР