ЖДҮ-лэгчдэд олгодог санхүүжилтээс төрийн өндөр албан тушаалтан болон УИХ-ын гишүүд мэдээлэлд ойр байдлаа ашиглан ихээхэн хэмжээний зээл авсан нь иргэдийн дургүйцлийг ихээхэн хүргэсэн. Үүний улмаас тухайн үеийн ХХААХҮ-ийн сайд З.Батзориг шүүхээс торгуулийн ялаар шийтгүүлсэн. Мөн УИХ-ын гишүүн асан Д.Дамба-Очир, Г.Солтан нар ял авч, зарим нь одоог хүртэл АТГ-т шалгагдаж байгаа юм.
Тэгвэл төрийн өндөр албан тушаалтнуудын зээлийн асуудлаар Засгийн газрын хэрэгжүүлэгч агентлаг Жижиг, дунд үйлдвэрийн газрын дарга Я.Эрдэнэсайханаас тодрууллаа.
-УИХ-ын гишүүд болон өндөр албан тушаалтнууд мэдээлэлд ойр байдлаа ашигласан ЖДҮХС-гаас зээл авсан нь иргэдийн дургүйцлийг ихээхэн хүргэсэн. Үүний улмаас ЖДҮХС-гийн санхүүжилт жинхэнэ эзэддээ хүрдэггүй юм байна гэх шүүмжлэл дагуулсан. Өнөөдөр яг Жижиг, дунд үйлдвэрийг дэмжих сангаас олгож буй хөнгөлөлттэй зээл нээлттэй, шударга, тэгш олгогдож байна уу?
-Олгогдож байгаа. УИХ-ын гишүүд болон төрийн өндөр албан тушаалтнууд ЖДҮХС-гаас зээл авсан гэх асуудлыг хууль, хяналтын байгууллагууд шалгасан. Зарим нь тогтоогдсон. Жижиг, дунд үйлдвэрийг дэмжих тухай хуулийг Ж.Ганбаатар нарын гишүүд санаачлан 2 жил гаруй хугацаанд хэлэлцүүлж, олон мянган жижиг дунд үйлдвэр эрхлэгчдийнхээ санаа бодлыг тусган 2019 оны 06 дугаар сарын 06-ны өдөр батлуулсан. Үүний дараа “Жижиг, дунд үйлдвэрийг дэмжих хөтөлбөр”-өө бас батлууллаа. Хууль хөтөлбөрийнхөө хүрээнд ЖДҮХ сангаас “Зээл олгох журам”-ыг Засгийн газрын хуралдаанаар мөн батлуулсан. Эдгээр нь зээлийг ил, тод шуурхай зөв олгох тал дээр өнгөрсөн хугацаанд гарсан алдаа, дутагдлыг арилгах бодлогын бичиг баримт. Эдгээр бичиг баримтдаа тулгуурлан 2019, 2020 оны төсөл сонгон шалгаруулалтаа зохион байгууллаа. Сонгон шалгаруулалтад орсон аж ахуйн нэгжүүдээс шалгарсан, шалгараагүй байдалд нь судалгаа хийж үзсэн. Бүгд л сэтгэл хангалуун байсан. “Хэдийгээр шалгарч амжаагүй ч гэсэн төсөл сонгон шалгаруулалтад оролцоод шударга болж байгаа юм байна. Өөрийнхөө төслийн алдааг олж харж чадлаа. Дараа жил төслөө өгөхдөө өмнөх алдаагаа ингэж засах юм байна гэдгээ мэдэж авлаа” гэж олон хүн хэлж байсан. Сонгон шалгаруулалт шударга болсон гэдэг нь харагдаж байгаа юм.
-УИХ-ын гишүүд ЖДҮХС-гаас авсан зээлээ төлж барагдуулсан. Төлөөгүй хүн бий юу?
-Улсын их хурлын гишүүд болон төрийн өндөр албан тушаалтнууд хамаарал бүхий компанидаа авсан зээлээ бүгд 100 хувь төлсөн. Бид 2019 оны зээлийн журамдаа төрийн өндөр албан тушаалтан буюу Ерөнхийлөгч, Ерөнхий сайд, Их Хурлын гишүүн, Засаг дарга, агентлагийн дарга гэх мэт өндөр албан тушаалтнууд хамаарал бүхий компаниар дамжуулан зээл авахыг хориглосон заалт оруулсан. Мөн сонгон шалгаруулалт хийхдээ ирүүлсэн бүх төслийн материалыг Авлигатай тэмцэх газарт хүргүүлж тулгалт хийгээд энэ аж ахуйн нэгжүүд төрийн өндөр албан тушаалтнуудтай хамааралтай байна уу, үгүй юу гэдгийг нэг бүрчлэн шалгуулсан.
