Хавдар судлалын үндэсний төвд коронавирусийн халдвартай 2 тохиолдол батлагдсанаар тус төвд өчигдрөөс эхлэн хөл хорио тогтоогоод байгаа юм. Одоогоор халдвар авсан хүмүүсийн ойрын хавьтлын 81 хүнийг тусгаарлан шинжилгээ авч эхэлжээ.
Тус төвд халдвар гарснаар хавдрын тусламж үйлчилгээ шаардлагатай иргэд хэрхэх талаар олон нийтийн дунд үл ойлголцол гараад байгаа юм. Энэ асуудлаар ЭМЯ өнөөдөр тайлбар мэдээлэл өгсөн юм.
Одоогоор ХСҮТ-д 277 хүн байгаагаас 201 нь эмч ажилтнууд, үлдсэн нь өвчтөн, сахиурууд байгаа юм байна. Нэг хүн маш хүнд. Тэрээр элэгний хорт хавдартай, үсэрхийлэлтэй. Эмч ажилтнууд эрүүл мэндийн үйлчилгээг шуурхай үзүүлж байгаа гэв. Өчигдөр гэхэд яаралтай 3 мэс засал хийгдсэн. Гаднаас эмч мэргэжилтнүүд авах шаардлагагүй. Цаашид халдвар нэмэгдэж эмнэлгийг хаахад хүрвэл авах арга хэмжээний төлөвлөлт хийгдсэн гэлээ.
Хавдартай хүмүүст шаардлагатай тусламж үйлчилгээг улсын төв эмнэлгүүд болон дүүргийн эмнэлгүүд үзүүлж байгаа учраас тэнд хандах боломжтой. Өөрөөр хэлбэл, ХСҮТ-д халдвар нэмэгдэж эмнэлэг үйл ажиллагаа явуулах боломжгүй болвол үйлчилгээг бусад эмнэлэгт шилжүүлэх боломжтой аж. Харин бусад эмнэлэгт байхгүй, шилжүүлэх боломжгүй ганц үйлчилгээ нь туяа эмчилгээ гэнэ. Энэ талаар албаны хүмүүс ярилцаж байгаа аж.
Эх сурвалж: shuurhai.mn Г.ОЧИР
