"FARO” сургалтын төвийн захирал, “Call-Рrо" компанийг үүсгэн байгуулагч, комедиан Б.Идэр-Од "Ideree`s HOME PARTY" сошиал нэвтрүүлгийг бэлтгэн гаргадаг. Тэрбээр энэ дугаартаа УОК-ын нэрээр нэгэн найз руугаа залгаж, халдварын ойрын хавьтал болсон талаар ярьдаг. Ингэхдээ УОК-ынхны нэрийг барин тоглоом шоглоом хийсэн нь цар тахлын үед байж боломгүй үйлдэл гэдгийг УОК-ын Шуурхай штабын дарга Б.Ууганбаяр мэдэгдлээ.
Тэрбээр "Марзан хошин юм яриад байдаг хэдэн нөхдүүд найз нөхөдтэйгээ УОК-ын нэр барьж, мэргэжлийн үг хэллэгийг буруу зориулалтаар хэрэглэж, хоорондоо марзагнаж байгаагаа олон нийтийн сүлжээнд тавьсан. Тиймээс УОК-ын Шуурхай штабаас эдгээр нөхдийг хууль хяналтын байгууллагад өгч шалгуулна. Халдварт өвчин тоглоом биш. Тоглоом тоотой нь дээр. Яг энэ мөчид маш олон хүн энэ өвчинтэй тэмцэх гэж нойр хоолгүй зүтгэж байна. Гэтэл хэсэг нөхөд энэ өвчнөөр маазарч, тоглож олон нийтийн сүлжээнд яриа хөөрөөгөө тавьж байна. Цаашид анхааруулж байна. Халдвар өвчнөөр, бүх нийтийн бэлэн байдалд шилжсэн үед бүх хүн хичээн зүтгэж байхад олон хүний хүч хөдөлмөрийг буруугаар ашиглаж, марзагнах юм бол хуулийн хатуу хариуцлага тооцно. Тэр зургаан нөхөр амны хаалтгүй суучихаад инээж хөхрөөд их сонин үйлдэл гаргасан. Үүнийг шалгуулна. Дэг журамтай байж байж энэ өвчний ард гарна гэдгийг дахин дахин сануулж байна" гэлээ.
