Өндөр настан Д одоогоос18 хоногийн өмнө гэрээсээ гараад сураггүй болж, эрэн хайх ажил нийслэл даяар үргэлжилж байсан юм. Тэгвэл өчигдөр цагдаагийн байгууллага өндөр настныг нас барсан байхад нь олжээ. Олон хоногийн турш ар гэрийнхэн нь итгэл тээж хайсан ч ийнхүү өөд болсон байсан нь харамсалтай. Талийгаачийн ар гэрийнхэнд эмгэлэн илэрхийлье.
Нөгөөтэйгүүр талийгаач Маск продакшны жүжигчин Д.Дэлгэрсайханы автомашинд нас барсан байдалтай олдсон нь олон нийтийн анхаарлыг татаж байгаа юм.
Eguur.mn цахим сайтын мэдээлснээр "“Маск” продакшны жүжигчин Д.Дэлгэрсайхан өөрийнх нь машинд нас барсан хүний цогцос байсан тул өчигдөр цагдаагийн байгууллагад хандаж дуудлага өгчээ. Тэрбээр арван хэд хоногийн өмнө клугер маркын автомашиных нь аккумлятор суусан учраас хаалгыг нь хааж чадалгүй …-р байрны гадна онгорхой орхисон аж. Ингээд хэд хоног машин дээрээ очиж чадаагүй бөгөөд өчигдөр очиход дээрх нөхцөл байдалтай угтсан байна. Талийгаачийн цогцос ил харагдах гэмтэл шархгүй, осгосон байдалтай олдсон бөгөөд задлан шинжилгээнд оруулж нас барсан шалтгааныг тодруулах аж. Гэхдээ ар гэрийнхэн нь задлан шинжилгээнд оруулах эсэх нь тодорхойгүй байна" гэжээ.
Эх сурвалж: shuurhai.mn Г.ОЧИР
