УИХ-ын чуулганаар ҮХЦ-ийн УИХ-аар 2020 оны 1 дүгээр сард баталсан Эрүүгийн хуульд нэмэлт өөрчлөлт оруулах хуулийн Дагаж мөрдөх журмын тухай хуульд орсон авлига албан тушаалын хэрэгт холбогдон шалгагдаж байгаа болон шийдвэр гарсан хүнийг сэргээн шалгах тогтолцоо нь Үндсэн хуулийг зөрчсөн хэмээн үзэж 12 дугаар дүгнэлтийг хэлэлцэж байгаа юм.
УИХ-ын гишүүн Т.Аюурсайхан “Ийм завхарсан зүйлийн хариуцлагыг өнөөдөр хэн хүлээх вэ. Нэг хэсэг нь хариуцлага хүлээж ялаа үүрдэг, нэг хэсэг нь ял завшаад үлддэг. Бид нар өнөөдөр цэцийн дүгнэлтийг хүлээж авахгүй байж болно. Их суудлын хуралдаанаараа 12 дугаар дүгнэлтээ баталгаажуулбал яах вэ. Хэсэг хүмүүс бие бие рүүгээ чихэж байгаад л хууль баталсан. Тэр алдаагаа засч болно гээд Дагаж мөрдөх журмын тухай хууль батлуулсан. Ийм зүйл хийсэн хүмүүс өөрсдөө Цэц дээр очиж хамгаал. Завхралаа засах хэрэгтэй. Хуульч гишүүдээ явуулах хэрэгтэй. Тэд онолоо хамгаалж нотлох хэрэгтэй. Парламентыг эвгүй байдалд оруулж байна. Бүх юм тодорхой үнэнд гүйцэгдэж байна. Хариуцсан шиг хариуцах хэрэгтэй. Яаж засах вэ, энэ асуудлыг. Эрүүрийн хуульд өөрчлөлт оруулах уу, яах уу” хэмээсэн юм.
Эх сурвалж: shuurhai.mn Г.ОЧИР
