Олон улсын газар хөдлөлтийн судалгааны байгууллагын мэдээллээр ОХУ-Монгол Улсын хилийн орчимд орон нутгийн цагаар 05:33 минутад М6.8-ийн хүчтэй газар хөдлөлт бүртгэгдсэнийг бид мэдээлээд байгаа билээ.

Хамгийн гол нь энэ газар хөдлөлтийн чичирхийлэл нийслэл Улаанбаатар хотод мэдрэгдээд байгаа юм.

Ч.Батсайхан: Энэ удаагийн газар хөдлөлт голомтдоо 9 баллаар мэдрэгдэх ёстой

Энэ асуудлаар Одон орон, геофизикийн хүрээлэнгийн мэргэжилтэн Ч.Батсайхан “Хөвсгөл аймгийн Ханх сумаас 35 км газарт өглөө 05.32 цагт 6.5 магнитудын газар хөдөллөө. Хүчтэй газар хөдлөлтийн чичиргээ Улаанбаатар хотын олон газар мэдрэгдээд байна. Улаанбаатарт ойролцоогоор 3 балл газар хөдөллөө. Мөн Хөвсгөл аймагтай залгаа аймгуудад чичиргээ мэдрэгдсэн. Хөвсгөл аймгийн Их-Уул суманд гэхэд 4-5 магнитудын газар хөдлөлт мэдрэгдэж байгаа.  Одоо мэдээ цуглуулах гээд явж байна. Хөвсгөл аймагт одоогийн байдлаар 40 удаа хүчтэй газар хөдлөлт болоод байна. Өмнө нь ийм хүчтэй 6.5 магнитудын газар хөдлөлт 1991 оны арванхоёрдугаар сарын 27-нд Хөвсгөл аймгийн Цагааннуур сумын Бүсийн гол орчимд болж байсан. Энэ удаагийн газар хөдлөлт голомтдоо 9 баллаар мэдрэгдэх ёстой. Хэрэв тэр хэсэгт барилга байшин барьсан бол нурах аюултай” гэв.

Сүүлийн жилүүдэд Монгол Улсад газар хөдлөлтийн чичирхийллийн давтамж нэмэгдсээр байгаа. Ялангуяа баруун чиглэлийн аймгуудад тэр дундаа Говь-Алтай аймагт маш олон удаагийн газар хөдлөлт болсон байдаг. Харин энэ удаагийн газар хөдлөлтийн балл өндөр, тэр хэрээр чичирхийллийн далайц Улаанбаатар хүрсэн нь олон нийтийн анхаарал татаж байна.

П.Даваадалай: Чулуун барилга, сургуулийн барилгад ан цав гарсан дуудлагаар яг одоо ажиллаж байна

Одон орон, геофизикийн хүрээлэнгийн мэргэжилтэн Ч.Батсайханы хэлснээр голомт дээрээ 9 балл хүрэх магадлалтай гэсэн билээ. Тэгвэл голомт дээрээ нөхцөл байдал ямар байгаа талаар Хөвсгөл аймгийн Хатгал тосгонд байрлах газар хөдлөлтийн станцын эрхлэгч П.Даваадалай тайлбар хийлээ.

Тэрээр “Хөвсгөл аймагт өглөө 05.32 цагт 51:21:136  кординат дээр эхний газар хөдлөлт боллоо. Тэрнээс хойш таван удаагийн давтамжтай 5 магнитудын газар хөдлөлт мэдрэгдсэн. Ханх сумын иргэд айж эмээсэн байдалтай байна. Тус суманд чулуун барилга, сүүлд баригдсан сургуулийн барилгад ан цав гарсан дуудлага, мэдээллийн дагуу Онцгой байдлын газар, Шуурхай штабынхан үзлэг хийж байна. Одоогийн байдлаар Хөвсгөл аймагтай залгаа байрлах Булган, Сэлэнгэ, Төв, Завхан, Улаанбаатар хот гээд олон газруудад газар хөдлөлтийн чичиргээ мэдрэгдээд байгаа” гэлээ.

Газар хөдлөлтийн чичирхийллээс айж эмээсэн иргэд гэр орноосоо гарч гудамжинд ил талбайд нэг хэсэг зогсцгоожээ. 

Эх сурвалж: shuurhai.mn Г.ОЧИР