Монголчууд бөхөд хайртай ард түмэн. Тийм ч учраас наадам наадмын түрүүг хамгийн дээдээрээ мялаадаг. Харин бөхчүүд улс төрд хайртай. Нэлээд олон бөх үе үеийн парламентыг түшилцсэн. Одоо ч тэр.

Бөх хүн улстөрч болохгүй гэсэн зүйл үгүй билээ. Гол нь улс төрд ороод юу хийж чадах вэ гэдгийг л ард түмэн хүлээдэг. Яг ийм жишгээр илгээсэн, хүлээсэн нэг бөх бол улсын аварга А.Сүхбат. Тэрээр 2016-2020 онд парламентын суудалд суусан. Нэг их гавьсан гавьяагүй буусан даа.

Харин аварга маань саяхан аагаа гайхуулан цар тахлын үеийн онцгой нөхцөл байдалд Монгол Улсын хууль журмыг зөрчин “томорсон” нэгэн мэдээлэл цацагдлаа. Тэрээр Дорнод аймгийн Халхгол суманд 4 хүний хамтаар энэ сарын 13-нд очжээ. Ингэхдээ аймаг, сум бүрт байгаа постоос зугтааж замгүй газраар явсан байна.

Ийнхүү ямар нэгэн постоор дамжаагүй, зөвшөөрөлгүй суманд нь нэвтэрсэн хүмүүсийг Халхгол сумын Онцгой комисс албадан тусгаарлажээ. Аварга А.Сүхбат ийн журам зөрчин очсон шалтгаан нь ердөө хурдан адуу авах зорилготой байжээ.

Аваргын ааг Монгол Улсын хууль журмаас давах эрхгүй. Тийм ч учраас аваргын албадан тусгаарласан Халхгол сумын Онцгой комисст баяр хүргэе.

Эх сурвалж: shuurhai.mn Г.ОЧИР