Пёньян хотноо энэ сарын 14-15-нд шилжих шөнө зохион байгуулагдсан цэргийн сүрт жагсаалын нээлтэд Умард Солонгосын удирдагч Ким Жон Ун том булган малгай, савхин дээл өмсөн оролцохдоо “дэлхийн хамгийн хүчирхэг зэвсэг” хэмээх шумбагч онгоцноос харвадаг баллистик пуужингаа танилцуулжээ.
Тус цэргийн сүрт жагсаал нь Ким Жон Уны ховорхон зохион байгуулдаг эрх баригч Хөдөлмөрчдийн намын их хурлыг тохиолдуулсан арга хэмжээ байж магадгүй хэмээн ажиглагчид үзэж байгаа юм.
Сүрт жагсаалын үеэр авсан 100 гаруй гэрэл зургийг өчигдөр/2021.1.15/ БНАСАУ-ын төрийн мэдээллийн агентлаг нийтэд дэлгэжээ. Зургуудаас харахад жагсаалаар танк, пуужин харвагч, сөнөөгч онгоц тэргүүтэй цэргийн хүнд техникүүдээ ил болгожээ.
Ажиглагчдын мэдээлж байгаагаар жагсаал дээр олны өмнө гарсан шинэ пуужингууд нь хатуу түлштэй ойрын зайн баллистик пуужингууд байж магадгүй гэнэ. Хатуу түлштэй пуужингууд нь шингэн түлштэй пуужинг бодвол ашиглахад илүү хялбар аж. Түүнээс гадна жагсаалд мөн шумбагчаас харвах зориулалттай Пуггүгсон ангиллын дөрвөн ч баллистик пуужин оролцжээ.
БНАСАУ-ын төрийн мэдээллийн агентлаг KCNA жагсаалын тухай мэдээлэхдээ “Дэлхийн хамгийн хүчирхэг зэвсэг буюу шумбагч хөлгөөс харвадаг баллистик пуужингууд нэг нэгээрээ талбайд гарч ирж байна. эдгээр нь үгээр хэлэмгүй хүчтэй бөгөөд манай улсын армид нэн чухал ач холбогдолтой юм” хэмээн ярьжээ.
Пёньян аль хэдийн шумбагчаас харвадаг пуужингуудаа хэд хэдэн удаа туршаад амжсан бөгөөд өдгөө пуужингуудыг тээвэрлэхэд хамгийн тохиромжтой шумбагч хөлөг бүтээхээр ажиллаж байгаа гэнэ.
Төрийн мэдээллийн агентлагийн онцолсноор шинэ пуужингууд нь Пуггүгсон-5 ангилалд багтаж байгаа бөгөөд энэ нь өнгөрсөн оны аравдугаар сард зохион байгуулсан сүрт жагсаал дээр танилцуулж байсан Пуггүгсон-4 пуужингаас илүү боловсронгуй, хүчирхэг гэнэ.
Эх сурвалж: shuurhai.mn
