УОК-ын дарга Я.Содбаатар дөнгөж сая мэдэгдэл хийлээ.
Тэрээр “Монголын ард түмнээсээ уучлал хүсье. Бидний баг Монголын төрд хоёргүй сэтгэлээр зүтгэлээ. Ковид 19 халдварыг дотоодод алдалгүй 10 сарыг өнгөрөөсөн. Үүний 5 сар нь шинэ Засгийн газрын ажил байсан. Цар тахлын эсэрг тэмцсэн бидний тэмцэл стратегийн алдаа гараагүй гэдгийг онцолъё.
Бид дэлхий дээр хамгийн сайн тэмцсэн 5 орны нэгээр одоо ч нэрлэгдэж байгаа. Нэг ч хүн нас бараагүй, цар тахал нийтийн өвчин болоогүй.
Тун удахгүй олон улсаас вакцин орж ирж, ард нийтээ вакцинжуулах ажил хийгдэнэ. Бид нэг ёсондоо очих цэгээ харж байсан юм. Хүнд цаг үед фронтод ажиллаж байсан эмч ажилтнууд, цагдаа, онцгой байдлын нийт бүрэлдэхүүн, Засгийн газар, УИХ хамтран ажилласанд баярлалаа.
Тиймээс УОК-ын даргын хувьд Шадар сайдынхаа албан тушаалаас огцорч байгаагаа мэдэгдэж байна. Энэ хүсэлтээ Ерөнхий сайдад хуулийн дагуу өгнө.
Эцэст нь хэлэхэд нийт ард түмнээсээ уучлал хүсч байна” гэлээ.
Эх сурвалж: shuurhai.mn Г.ОЧИР
