Төрийн мөнгөнөөс 33 тэрбумыг нэг нь зээлдүүлж, нөгөө 2 нь зээлсэн УИХ-ын 3 гишүүн өнөөдөр хүртэл эс тоосон янзтай байна. Тэд энэ үйлдлээ зөв гэж үзэж байгаа бололтой. Өнөөдөр хэн нь ч ямар нэгэн байдлаар уучлал гуйсан үйлдэл гаргасангүй. Харин ч энэ бол УИХ-ын гишүүнд хамаагүй, гишүүн болохоос өмнө авсан асуудал хэмээн өөрсдийгөө хаацайлах янзтай.
УИХ-ын гишүүн Г.Амартүвшин Хөгжлийн банкны захирал байхад Банкны хууль дээр хамт ажиллаж буй Г.Дамдинням, Х.Ганхуяг нарын хамаарал бүхий компаниуд тус банкнаас их хэмжээний зээл авчээ. Тодруулбал, Хөгжлийн банкнаас “Вертекс майнинг партнер” ХХК 33 тэрбум төгрөгийн зээл авчээ. Тухайн компанийн гол хувьцаа эзэмшигч нь Г.Дамдинням байна. “Вертекс майнинг партнер” ХХК-ийн гүйцэтгэх захирлаар Хассуурийн Хашчимэг ажилладаг болох нь opendata.burtgel.gov.mn цахим хуудаст байна. Х.Хашчимэг нь дээрх тогтоолын төсөл өргөн барьсан УИХ-ын гишүүн Хассуурийн Ганхуягийн төрсөн дүү юм байна. Түүгээр тогтохгүй Х.Ганхуяг нь “Хэра инженеринг” ХХК-ийн 50 хувийг эзэмшдэг бол түүний охин компани “Хэра инвестмент” ХХК-ийн 10 хувийг УИХ-ын гишүүн Г.Дамдинням эзэмшиж байна.
Ийм сүлжээгээр холбогдсон хүмүүс бичил бизнесийн зээлийг 50 хувиар бууруулъя хэмээн зорилго нэгдэн тогтоолын төсөл санаачилсан нь олон нийтийн анхаарлын төвд байсаар байна.
Энэ асуудал яавч зүгээр өнгөрөх асуудал биш. УИХ-ын Ёс зүйн дэд хороо үүнийг заавал авч хэлэлцэх ёстой. Гишүүд болохоос өмнө ашиг сонирхол, халаас нэгдсэн гишүүд гишүүд болонгуутаа ингэж хөдөлж байгааг зөвтгөх үндэслэл байна уу. Ирэх дөрвөн жил эдгээр гишүүдээс төлөөлсөн тойргийнхээ сонгогчдын эрх ашгийг хамгаална гэхээс илүү өөрсдийн ашиг сонирхлыг гүйцэлдүүлэх нөхцөл үүгээр илэрхий байгаа юм.
Тиймээс УИХ-ын Ёс зүйн дэд хороогоор энэ асуудлыг яаралтай хэлэлцэх ёстой гэж үзэх хүмүүс гарч эхэллээ. Цаашлаад гишүүний эрхээс нь татах асуудал ч яригдах ёстой.
Эх сурвалж: shuurhai.mn Г.ОЧИР
