Жил бүр уламжлал болгон зохион байгуулагддаг “ХИППО 2021” олон улсын англи хэлний олимпиадын бэлтгэл ажил эхэллээ.
Тус олимпиадыг албан ёсоор Монгол Улсад зохион байгуулах эрхтэй байгууллага бол “Ай И Ди Си” байгууллага юм. Тус байгууллагаас дэлхий дахиныг нөмөрсөн “Ковид 19” цар тахлын улмаас “ХИППО 2021” олимпиад цахим хэлбэрээр зохион байгуулагдахаар болсныг мэдээлж байна.
"Хилээр хязгаарлагдахгүй англи хэл" уриатай тус олимпиад нь англи хэлний мэдлэгээ сорих чин хүсэл, зорилготой сурагчдыг дэмжиж, дэлхий дахинд тэдний үе тэнгийнхний харилцааг хөгжүүлэх, багш нарын хамтын ажиллагааг өргөжүүлэн, залуу үеийнхний хооронд найрсаг харилцаа, нөхөрсөг өрсөлдөөнийг бий болгох эрхэм зорилго бүхий олон улсын олимпиад юм.
“ХИППО” олон улсын англи хэлний олимпиадад Монгол Улсаас жил бүр 3000 орчим сурагч оролцож ур чадвараа сорьдог төдийгүй олон улсад амжилт гаргаж ирсэн билээ. Тухайлбал, “ХИППО 2019” олимпиадын сүүлийн шатанд 16 сурагч шалгаран Итали улсын Венец хотноо олимпиадын сүүлийн шатанд оролцсон юм. Тус олимпиадаас монгол сурагчид нийт 3 алтан медалийг хүртэж амжилттай оролцсоныг дуулгахад таатай байна.
“ХИППО 2021” олимпиадтай холбоотой дэлгэрэнгүй мэдээллийг www.hippo.mn цахим хуудаснаас авна уу.
Эх сурвалж: shuurhai.mn Г.ОЧИР