УИХ-ын гишүүн С.Ганбаатар Оюу толгой төслийн асуудлаар Арбитрт хандахыг шаардаж Төв талбайд суулт зарлан улмаар өлсгөлөнд шилжээд байсан юм. Эмч нар түүний эрүүл мэнд эрсдэлтэй байгаа талаар удаа дараа мэдэгдэж байсан ч тэрээр тэмцлээ үргэлжлүүлсээр байв.
УИХ, Засгийн газрын зүгээс түүнийг тэмцлээ зогсоохыг хэдэнтээ шаардсан боловч тусыг олоогүй. Харин дөнгөж сая Хууль зүй дотоод хэргийн сайд Х.Нямбаатар, УИХ-ын гишүүн Д.Тогтохсүрэн, С.Даваасүрэн, Х.Болорчулуун, Б.Бат-Эрдэнэ нар С.Ганбаатартай уулзаж Засгийн газар түүний хүсэлтийг хүлээж хүлээн авч байгааг мэдэгдэн өлсгөлөнгөө зогсоохыг хүслээ.
Улмаар С.Ганбаатар зөвшөөрөн Төрийн ордонд орж Оюу толгойн асуудал дээр хүсэлтээ гарган албажуулахаар тохиролцов. УИХ-ын гишүүд С.Ганбаатарын хүсэлт бүхий албан бичиг, хүсэлтийг УИХ-ын дарга, Ерөнхий сайдад танилцуулахаар ороод байна.
УИХ-ын гишүүн С.Ганбаатарын зүгээс өөрийнх нь хүсэлтийг бүрэн хүлээж авсны дараа албан ёсоор өлсгөлөнгөө зогсооно гэж мэдэгдээд байна.
Эх сурвалж: shuurhai.mn Г.ОЧИР
