Ерөнхий сайд асан Ч.Сайханбилэг видео мэдэгдэл хийлээ.

Тэрээр “...Хамгаалахад хэцүү биш ээ. Гэхдээ та улс төрийн нөлөө оролцоог нь хаагаад өгч чадах уу. Тэгэхгүй бол хуулийн хэчнээн сайн үндэслэл гаргаад ч хий хоосон ажил болох гээд байна гэдгийг сонсоход үнэхээр сэтгэл гонсоймоор.

Хуульд захирагдах ёстой шүүгч прокурорыг томилохдоо Ерөнхийлөгч өөртөө захирагд гэж дарамтлаад үгүй бол огцрох өргөдлөө огноогүй бичиж өгөхийг шаарддаг гэж Ерөнхий сайд нь ажлаа өгөхдөө мэдэгдсэнийг бодохоор үнэхээр сэтгэл өвдмөөр.

Хууль зүйн сайд нь Ерөнхийлөгч албан өрөөндөө шүүгч нарыг дуудаж  хэнд ямар зүйл ангиар хэдэн жилийн ял өгөхийг даалгадаг Ерөнхийлөгчтэй гэдгийг хараад үнэхээр уур хүрмээр.

Чамайг төрийн нэр ашиглан баривчилж байгаад шоронд хатааж тэнд нь хувиараа ална аа гэдэг заналхийллээр байж болох бүх сувгаар надад хүрэхээр оролдож байгаа Ерөнхийлөгчтэй гэж бодохоор үнэхээр дургүй зэвүү зэрэг хүрмээр.

Энэ бүхэн солонгос савангийн дуурь эсвэл молливудын кино зохиолын мөрүүд биш ээ. Энэ бол бидний бодит байдал, өнөөдрийн дүр төрх. Холбогдох хэд хэдэн хууль байтугай Үндсэн хууль зөрчсөн Ерөнхийлөгчийн дүр төрх зөвхөн 3-хан хоног сошиалын сэвэлт болоод мартагдах учиртай гэж үү.

Энэ Ерөнхийлөгч Монгол ялна гэдэг боловч Монголоо ялагдуулаад дууслаа. Өөрөө 800 км төмөр зам тавьж байгаа гэж хэлдэг ч 267-хон км яваад бэл дээрээ очих төмөр зам өнөөдөр ч дуусаагүй л байна. Хятадад нүүрс нийлүүлэх Австралийн орон зайг Орос нөхөж, харин Монгол ялагдлаа. Гуравдагч хөршийн хөрөнгө оруулагч дээр түшиглэсэн Оюу толгой төслийг хөдөлгөсөн хүмүүсийг бүгдийг нь шоронд хийсэн. Өнөөдөр УИХ Засгийн газрын урдуур энэ асуудлын дундуур шургаж энэ төслийн ажлын хэсгийг хэзээ ч асуудал шийдүүлэхгүй бүтэлгүй попуудаар дүүргэх гэж байна. Цаад санаа нь ердөө л гуравдагч хөршийн хөрөнгө оруулагчийг хөөж гаргах, хоёр хөршид уг төслийг барьж өгөх Монголыг дахин ялагдуулах болно. Түүний бүрэн эрхийн 4 жилийн хугацаанд хүмүүсийн амьжиргааны түвшин улам буурлаа. Эдийн засгийн өсөлт зогслоо. Хувийн хэвшлүүд үүд хаалгаа барилаа.  Том компаниудыг өөртөө үнэнч эсэхээр нь 2 хуваалаа. МАНАН, 30 гэр бүл, оффшор гэсэн хуйвалдааны баахан хуурмаг гомдлыг бий болголоо. Гэхдээ өөрөө жинхэнэ МАНАНГ байгуулж, оффшорын жинхэнэ эзнээр өөр хүмүүс бус өөрөө тодорлоо.

Бүтээн байгуулалтын жинхэнэ ажлуудыг бус бүтэлгүй үзэл суртлын дайн өрнүүлж монголчуудыг талцуулж нийгмээ дэндүү харалган болголоо.

Манай улс сүүлийн 30 гаруй жилийн хугацаанд Төв Ази дахь ардчиллын цорын ганц баянбүрд гэж нэрлэгдэж ирсэн. Ардчилал чөлөөт зах зээл хүний эрх эрх чөлөө хуульд захирагдах ёс, хараат бус шүүх засаглалаа өдөр бүр арчиж тордож суухгүй бол нүд ирмэхийн зуур алдах боломжтойг дарангуйлал руу гулсах боломжтойг ардчиллын баянбүрд асар хурдан цөлжих аюултайг бид мэдэрлээ. Бип энэ бүхнийг хараад зүгээр гар хумхин сууж болохгүй. Энэ хэвээр үргэлжилбэл сайнаар бол нэг намын тогтолцоо тогтоно, саараар бол нэг хүний диктатур тогтоно. Болоод өнгөрсөн үйл явдлын мөн чанарын ойлгох, дахин гаргуулахгүй байх зорилгоор хууль дээдлэх ёсыг тогтоож хараат бус шүүх засаглалыг бий болгох зорилгоор олон улсад Амстердамын партнерс хуулийн товчоотой хамтран өөрийн цагаан номоо гаргаж байна” гэжээ.

Цагаан номыг saikhanbileg.com хуудсаас татаж авч унших боломжтой аж.  

Эх сурвалж: shuurhai.mn Г.ОЧИР