Чингэлтэй дүүргийн Эрүүгийн хэргийн анхан шатны шүүхэд Нийслэлийн прокурорын газраас яллах дүгнэлт үйлдэж ирүүлсэн Э.Бат-Үүл нарын 11 хүнд холбогдох эрүүгийн хэрэг хянагдаж байна.
Тус хэрэгт 11 шүүгдэгч, 20 өмгөөлөгч, улсын хоёр яллагч, бусад оролцогч 29 бөгөөд нийт 62 оролцогч байгаа бөгөөд өмнө нь товлогдсон шүүх хуралдаан КОВИД-19 цар тахлын улмаас 2021 оны хоёрдугаар сарын 2-ны өдрийн 10:00 цаг хүртэлх хугацаагаар хойшилсон байсан юм.
Гэвч өнөөдрийн шүүх хуралдаанаар шүүгдэгч нарын нэр бүхий өмгөөлөгч нар КОВИД-19 цар тахлын улмаас тусгаарлалтад байгаа гэх үндэслэлээр ирээгүй, энэ талаарх нотлох баримтаа шүүхэд ирүүлснийг шүүх хүлээн авч шүүх хуралдааныг тодорхойгүй хугацаагаар хойшлуулж шийдвэрлэсэн.
Эргэн сануулбал, Хотын дарга асан Э.Бат-Үүл, Төрийн орон сууцны санхүүжилтийн корпорацын захирлаар ажиллаж байсан А.Гантулга, "Бэрэн групп" компанийн захирал Б.Мөнхтөр нарыг бүлэглэж, эрх мэдэл, албан тушаалын байдлаа урвуулан ашигласан, мөнгө угаасан гэх хэрэгт прокуророос яллах дүгнэлт үйлдэн шүүхэд ирүүлсэн юм.
Эх сурвалж: shuurhai.mn Г.ОЧИР
