УИХ-ын намрын чуулганаар шинэчлэн батлагдсан Банкны тухай хуулийн нэмэлт өөрчлөлтөд Монгол Улсад үйл ажиллагаа явуулж буй арилжааны банкнууд тодорхой хугацааны дотор олон нийтэд хувьцаагаа арилжаалж, өмчийнхөө төвлөрлийг сааруулах чухал заалт орсон билээ.

Тэгвэл "Богд" банк Монголын хөрөнгийн бирж дээр шинээр хувьцаа гаргахаа зарлаж, нийт хөрөнгийнхөө 20%-ийг иргэдэд нээлттэй санал болгосон олон нийтийн өмчлөл бүхий анхны банк болсныг өнөөдөр зарлав.

Тус банкны хувьцааг олон нийтэд танилцуулан арилжаалах үндсэн андеррайтераар "Ард Секюритиз" үнэт цаасны компани ажиллахаар болсон байна.

Монголд сүүлийн 12 жилд хийгдээгүй анхны IPO гаргаж байгаа банк энэ юм байна. Монголд хамгийн их хөгжсөн салбар нь харилцаа холбоо, банкны салбар боловч Хөрөнгийн бирж дээр банкны хувьцаа авах боломж өмнө нь байгаагүй. Тодруулбал, сүүлийн 12 жилд Монголын хөрөнгийн бирж дээр банкны хувьцаа арилжаалагдаагүй гэсэн үг.

Банк ийнхүү нээлттэй компани болсноор засаглал нь илүү сайжрахаас гадна олон хувьцаа эзэмшигч байх тусам хөрөнгө нь өсөх ач холбогдолтой. Хөрөнгө нь нэмэгдэхийн хэрээр эргээд зээлийн хүү нь ч буурах боломж бүрдэх юм. "Ард секюритиз" сүүлийн үед хөрөнгийн зах зээлд маш идэвхтэй үйл ажиллагаа явуулж байгаа компаниудын нэг. Он гарсаар Монголын хөрөнгийн биржийн арилжааны 80 гаруй хувийг явуулж байна.  Мөн "Ард" аппликейшнийг өнөөдөр 650 гаруй мянган хүн хэрэглэж байна. Энэ нь тэдгээр хүмүүс "Богд" банктай хамтран ажиллаж, хувьцаа эзэмшигч нь болох боломжтой аж.