Ерөнхий сайд асан Ч.Сайханбилэг тун чиг сонин стильтэй боллоо. Анх түүнийг хилийн чанадаас мэдэгдэл, ярилцлага хийдэг байхад хүмүүс анхаардаг байв. Сүүлд ЗГХЭГ-ын дарга Б.Солонгод илгээсэн захидлыг тодорхой хэсэг нь тогтож уншицгаав.
Гэтэл сүүлд илгээсэн видео бичлэгээс экс Ерөнхий сайдад эргэлзээ төрж эхэллээ.
Түүнтэй нэг танхимд, гарынх нь дор ажиллаж байсан хүмүүс шүүхийн танхимд орж, ял аван эдүгээр шоронд сууцгааж байна. Харин тэр өөрөө хилийн чанад руу зугтаасан. Юу үнэн энэ үнэн.
Харин тэр байсхийгээд л хилийн гаднаас ган ган хийдэг болов. Сүүлд түүний ярьсан бичлэг тун эв хав муутай, авцалдаа ойлгомж тааруу, чухам юуны тухай ярьж буйгаа тайлбаргүйгээс тасалсан бичлэг Монгол руу илгээж. Яг л дөнгөж бичлэг хийж үзэж байгаа хүүхэд шиг. Уг нь тэр Ерөнхий сайд байсан хүн. Насны хувьд ч залуу. Ийм хэмжээний хүн Монголын нийт хүн амд зориулж хийж байгаа бичлэгээ мэргэжлийн түвшинд бэлтгээд явуулчихаж чадсангүй.
Ярьж буй зүйлийнх агуулгыг дундаас нь хойш ойлгоход Ерөнхийлөгч Х.Баттулга руу нэг үсчиж, Оюу толгой, цаашлаад УИХ-ын гишүүдийг чимхээд авчээ.
Хамгийн сонирхолтой нь түүнийг ард олон улстөрчөөр хүлээж авна. Түүний ярьсан зүйл ч улс төрийн сэдэвтэй. Гэтэл улс төрийн мэдэгдлийнхээ ард уянгын ая дэвсэж, яриагаа “...өвдмөөр, хүрмээр...” зэрэг уран зохиолын өнгө аясаар төгсгөж эморч харагдана.
Түүний мэдэгдэл хэн нэгэнд сэрэмж өгөхөөс илүүтэй шүүмжлэлд өртөөд өнгөрч байна.
Эх сурвалж: shuurhai.mn Г.ОЧИР
