Дархан-Уул аймагт коронавирусийн халдварын 2 тохиолдол илэрчээ. Тэдгээр иргэд энэ сарын 7-нд Улаанбаатар хотоос очсон иргэд аж. Улаанбаатарт PCR шинжилгээ өгөөд сөрөг гарсан бөгөөд тусгаарлалтын хугацаанд ийнхүү халдвар илэрчээ.
Энэ талаар аймгийн Онцгой комиссын дарга Б.Азжаргал мэдээлэл хийлээ. Тэрээр “Улаанбаатар хотын Амгалан төрөх эмнэлэгт хэвтэн эмчлүүлж дуусаад 2021 оны 2 дугаар сарын 7-нд ирсэн иргэн болон гэр бүлийнх нь хүнээс сэжигтэй тохиолдлууд илэрлээ.
Дархан харьяат иргэн 1 дүгээр сарын 20-нд УБ хот руу яваад эмчилгээнд хамрагдаад 2 дугаар сарын 7-нд Дархан-Уул аймагт Онцгой комисст бичгээр хүсэлтээ гаргасан. Хорт хавдрын эмчилгээ хийлгээд гарсан учраас орон нутагтаа ирэх хүсэлтэй байна гэж.
Тухайн иргэнийг 22-ын товчооноос очиж гэр бүлийнх нь хүн аваад ирсэн. 2 иргэн ирсэн Дархан-Уулд ирсэн гэсэн үг. Ирэхдээ УБ-аас ирсэн иргэн PCR шинжилгээний хариутай. 2уулаа Дархан-Уул аймаг руу нэвтрэхдээ постон дээр түргэвчилсэн оношлуурын шинжилгээнд хамрагдсан. Тэгэхэд хоёулаа сөрөг гарснаар гэртээ харьсан. Тухайн иргэдийг өнөөдөр буюу анхан шатны шинжилгээг авахад хариу нь 15 цагт сэжигтэй гарсан учраас ЭМЯ, ХӨСҮТ рүү мэдээллийг хүргэж УБ хот руу шилжүүлэх арга хэмжээ авч байна.
Халдварын эх үүсвэр УБ хотод идэвхтэй байгаа нэг голомт буюу Амгалан амаржих газраас үүсэлтэй байх магадлалтай. Тухайн иргэд маань халдвар хамгаалал, тусгаарлалтын журмаа ягштал мөрдөж ажилласан гэр бүл байна. 7-ноос хойш өнөөдөр хүртэл гэрээсээ огт гараагүй, бусад иргэдтэй хавьтал болоогүй. Ээж аав нь нэг хашаанд цуг байдаг ч Сар шинийн баярыг тэмдэглээгүй. Хагалгаанд орсон учраас 2 сувилагч 2 удаа очиж боолт хийсэн. Ингэснээр бидний үйл ажиллагаанд дөхөм болж байна. Тухайн иргэдтэй хавьтал болсон эмнэлгийн ажилтнууд, постон дээр ажиллаж байсан 8 хүнийг ойрын хавьтлаар тусгаарлаад байна” гэв.
Эх сурвалж: shuurhai.mn Г.ОЧИР
