Монголчууд өчигдөр нэгэн зүйлийг өөрсдийн нүдээр харлаа. Автомашины азын гэгддэг дугааруудыг өндөр ханш амалсан дуудлага худалдаа болж, 20 дугаар 682.7 сая төгрөгөөр зарагдав.

0001 УАР дугаар гэхэд 427.450.000 төгрөгт хүрлээ.

1111 УАР дугаар 76.1 сая төгрөг

0011 УАР дугаар 70.9 сая төгрөг

0101 УАР дугаар 64.1 сая төгрөг гэх мэтээр хамгийн хямд нь 950.000 төгрөгт хүрч зарагдлаа.

Үүнээс монголчуудын амьдралын ялгаа шууд харагдаж байгаа юм. Ерөөсөө Монголд нийгмийн 2 давхар байна.

4 тоо 3 үсгээр гангарахын тулд доогуур түвшний амьдралтай хэдэн арван айл өрхийн амьдралыг өөд нь татах, 10 айлыг нэг өрөө байраар хангах хэмжээний өртөгтэй нарийн төмрийг машиныхаа нэг өнцөгт хадах нь.

Чухам үсэг, тооны ялгарал Монголд яагаад ийм чухлыг энэхүү дугаар авч байгаа хүмүүс л тайлбарлах биз.

Гагцхүү өнөөдөр:

-40 сая төгрөгөөр нэг өрөө байртай болох гэж нэг залуу гэр бүл 20 жилийн амьдралаа барьцаалж, банкинд 120 сая төгрөг болгон хүүлүүлж төлдөг.

-Захын гэр хорооллын хэдэн арван мянган айл өрх 4 тоо 3 үсэгний үнээс 10 дахин хямд байрны тухай амьдралдаа ч мөрөөдөж үзээгүй байдаг.

-Хогийн цэг дээр олон зуун хүүхдүүд өдөр өдрийнхөө амин зуулгыг түүж хоног төөрүүлдэг.

Ингээд яривал нийгмийн доод дээд давхаргын ялгаа дэндүү алсарч байгаа нь дээрх 3 жишээ болон нэг дугаарын үнээс л харагдаж байгаа юм.

Угтаа Монгол Улсын Үндсэн хуулинд хүн бүр эрүүл аюулгүй орчинд амьдрах, төр засгаас тэгш хүртээмжтэй бодлогоор хангагдах, ажлын байраар хангуулах зэрэг эрх тэгшийн тухай хуульчилж өгсөн байдаг билээ.

Эх сурвалж: shuurhai.mn Г.ОЧИР