Монголыг соён гэгээрүүлэгч багш нар нэгдэн тун удахгүй ард нийтэд аюулт цар тахлаас урьдчилан сэргийлэх вакцин аль нэг улсын явуулгатай, монголчуудын генийг устгар биотерроризм хэмээн олон нийтийн сүлжээнд дуу нэгтгэн эсэргүүцэж байна.

Дөрөв дэх засаглал гэгддэг хэвлэл мэдээллийн хэрэгслийн гадаад мэдээний тоймч хүн коронавирусийн эсрэг вакциныг “Ямар ч Ш/Уны судалгаа хийгдээгүй туршилтын вакциныг хүн төрөлхтөнд толгой дараалан хийх гэж байна. Монгол ч гэсэн Хийнэ гэдгээ Хүрэлсүх хэлсэн шүү дээ.

Вакцин хийнэ гэдэг чинь хүний дархлалын системийг сөнөөнө гэсэн үг.Вакцин хийлгэсэн хүн хийлгээгүй хүнээс 4 дахин илүү өвчинд автдаг гэдгийг эрдэмтэд тогтоочихсон байгаа” хэмээн мэдэгдэж түүнийг мянга мянган монголчууд уйхаалан дэмжиж байна.

Монгол Улсын төрийг түшилцэж байсан УИХ-ын гишүүн хүн “Уучлаарай. Би болон миний хүүхдүүд хаанахын ямар ч вакцин тариулахгүй. Тийм эрх байна биз дээ. Би вакцин хийлгээрэй гэж итгэлтэй уриалж чадахгүй. Түүний аюулгүй байдлын тухай хангалттай нягталсан мэдээлэлгүй байна” хэмээжээ.

Иргэд ч ийм маягаар эсэргүүцсэн сэтгэгдэл хэдэн зуугаараа олон нийтийн сүлжээнд хөвөрч байна. Бүр “Дарга сайд нар Хятадын вакцин хийлгэ, ард иргэдэд Оросын вакцин хийлгэе” гэсэн санаачлага ч гарч байгаа сурагтай.

Дэлхий ертөнц даяарчлагдаж хүн төрөлхтөний дунд юу болж байгаа мэдээллийг гэр дотроосоо авчихдаг болсон энэ эрин үед монголчууд үзэл бодолдоо салхи оруулж, шинжлэх ухаанчаар хандах цаг болсон.

Вакцин гэдэг нь тухайн өвчний эсрэг дархлааг сайжруулах биологийн бэлдмэл юм. Жил гаруйн хугацаанд дэлхий дахиныг сөгдүүлж байгаа шинэ төрлийн коронавирусийн эсрэг вакциныг олон улс орон хийлгэж эхлээд байна.

Манай улс гэхэд 4 орны 4 төрлийн вакциныг оруулж ирэх гэрээ хэлэлцээр хийгдэж эхний ээлжийн вакциныг өчигдрөөс татаж авах ажиллагааг эхлүүлснийг Ерөнхий сайд мэдэгдсэн. Тэдгээр 4 вакциныг ДЭМБ албан ёсоор бүртгэж авсныг ч олон нийтэд өчигдөр зарласан.

Үүнээс илүү ямар мэдээлэл манай монголчуудад шаардлагатай болчихоод биетерроризм хэмээн дээр доргүй хашгиралдах болов.

Нэг зүйл үнэн байгаа нь коронавирус бол халдварт өвчин. Тэр тусмаа хамгийн хөнөөлт өвчин гэдэг нь БНХАУ-ын жишээн дээрээс харагддаг. Өнөөдөр Монгол Улс цөөн хүн халдварласан тулдаа эмнэлгийнхээ хяналтад байлгаж, нас баралтыг барьж чадаж байна. Энэ байдлаараа цаашид нэмэгдсээр байх төлөвтэй халдварт өвчнийг эмнэлгийн хяналтад барьж чадахгүй бол нас баралт гарч эхэлнэ.

Харин үүнээс сэргийлэх зүйл бол вакцин. Монголд өмнө ч хэд хэдэн удаагийн том хэмжээний халдварт өвчин гарч байсан удаатай. Тэр бүрт ард иргэдээ вакцинжуулсны хүчинд ард нь хохирол багатай даван гарсан.

Дэлхийн хэмжээний мэргэжлийн байгууллага нь хүлээн зөвшөөрч ганц Монгол гэлтгүй хөгжингүй том орнууд ард иргэддээ тариулж эхлээд байхад бид ийм мунхаг зүйлээр өөрсдийгөө хуурч сууж болохгүй юм.

Эцсийн дүнд монгол цустан биднийг аминчхан бурангуй мунхаг үзэл бодол л мөхөөх шинжтэй болоод байна.

Эх сурвалж: shuurhai.mn Г.ОЧИР