Цар тахлын үед эдийн засгаа сэргээхийн тулд төрийн байгууллагууд 2021 оны бүсээ чангалахыг Ерөнхий сайд мэдэгдээд байгаа. Засгийн газрын хуралдаанаар өчигдөр гэхэд 2021 онд төрийн байгууллагуудын цалин нэмэхгүй, шагнал урамшуулал олгохгүй, автомашин, тавилга шинээр авахгүй, ой аялал зугаалга, найр наадам хийхгүй, кино нэвтрүүлэг бэлдэхгүй байхаар шийдлээ.
Энэ бол эдийн засаг хүндэрсэн нөхцөл байдалд бага ч гэсэн зардал хэмнэх арга. Засгийн газрын энэ зорилго аймаг орон нутагт хэрэгжихгүй нь бололтой!
Өмнөговь аймгийн ИТХ саяхан нэгэн тендер зарлажээ. Аймгийн ИТХ-ын албан хэрэгцээнд 257.000.000 төгрөгийн 2017 оны Lexus-570 автомашин худалдаж авах тендер зарласан байна.
Монгол Улс зөвхөн өнөөдөр эдийн засгийн хүнд нөхцөлд орж байгаа юм биш. Жил гаруйн өмнөөс цар тахал дэгдэж хил гаалиа хумьснаар эхэлсэн. Бүхэл бүтэн жилийн хугацаанд нийслэл төдийгүй аймаг орон нутгууд төсвийн мөнгөндөө хэмнэлт зарлах ёстой. Гэтэл Өмнөговь аймгийнхан ийнхүү сүүлийн үеийн өндөр үнэтэй автомашинаар гангарахаар улсын төсвийн хөрөнгийг зулгааж байдаг ажээ.
Энэхүү тендер нь брэндийн нэр зааж өгснөөрөө хууль зөрчихөөс гадна хэмнэлтийн горимд ажиллаж байгаа Засгийн газрын шийдвэрийг зөрчиж байгаа явдал болж байгаа юм.
Эх сурвалж: shuurhai.mn Г.ОЧИР
