“Цэнхэр тэнгэрийн орон”, “Монголоороо байгаасай”, “Дулаахан намар”, “Манай адуу”, “Санахгүй гэсэн юм аа” зэрэг энэ цаг үеийн хит болсон зохиолын дууны хөгжмийг бичсэн Монгол Улсын Соёлын тэргүүний ажилтан Буяндэлгэрийн Пүрэвсүрэн өнгөрсөн Сар шинийн баярын босгон дээр Хөдөлмөрийн гавьяаны улаан тугийн одонгоор шагнагдсан билээ.
Монголын хөгжмийн салбарыг өнгөлж яваа цөөхөн уран бүтээлчийн нэг түүнийг төр засагтаа ийнхүү үнэлүүлсэнд уран бүтээлчид, хамтран зүтгэгсэд, сонсогч олон түмэн эдүгээ хүртэл ихэд билэгшээн бахархаж явна. Арга ч үгүй. Зохиолын дууны салбарт танигдсан уран бүтээлч бүрийн брэнд нь Б.Пүрэвсүрэнгийн бүтээл байдаг юм. Тиймдээ ч өнөөдөр хүртэл 20 гаруй дуучин, уран бүтээлчид өөрийнхөө цомог, уран бүтээлийн тоглолтоо түүний бүтээлээр нэрлэсэн байх нь бий.
Төр засгийн хүндэт шагнал Хөдөлмөрийн гавьяаны улаан тугийн одон хэмээх шагналынхаа нэр шигээ хөдөлмөрлөж хүн бүрийн сэтгэлд хоногшин үлдэх сайхан уран бүтээл туурвисаар байгаа Монгол Улсын Соёлын тэргүүний ажилтан Буяндэлгэрийн Пүрэвсүрэнд уран бүтээлийн өндөр амжилт хүсэн ерөөе.
Эх сурвалж: shuurhai.mn
