Ерөнхийлөгч Х.Баттулга ойрд ихэд завгүй явна. Өчигдөрхөн Үндсэн хуулийн цэц дээр өөрийн биеэр очиж Ерөнхийлөгчийн сонгуулийн тухай хуулийн тайлбарыг хийсэн мэдээлэл цахимаар нэг явлаа.
Ерөнхийлөгчийн сонгуулийг угтаж нэр дэвших хүмүүсийн асуудал олон нийтийн анхаарлын төвд байгаа нь үнэн. Шинэ хуулиар одоогийн Ерөнхийлөгч Х.Баттулга нэр дэвшинэ, дэвшихгүй гэсэн маргаантай тайлбарууд явсаар байгаа. Угтаа үүнийг хууль хэрэгжүүлэгчид, сонгууль зохион байгуулагчид шийдэх учиртай.
Харин Ерөнхийлөгч үүний араас ихэд сэтгэл чилээн өөрийн биеэр ҮХЦ дээр очиж тайлбар хийжээ. Тайлбар хийх хүн нь ч тэрээр биш. Гэвч тэрээр “Үндсэн хуулийн өөрчлөлтийг хүн бүр дураараа тайлбарлаж байна. Үүнийг болиулах ёстой” гэсэн утга агуулж, шинэ хуулиар өөрөө нэр дэвших боломжтой гэсэн мэссэжийг өгөөд буцжээ.
Үргэлжлүүлэн өчигдөр орой Ерөнхийлөгчийн хувийн телевиз С1 телевизээр Ерөнхийлөгчийн Тамгын газраас АТОЗ хөдөлгөөнийнхөн оролцсон Ерөнхий сайд асан Сү.Батболдын оффшор компанийн сүлжээний талаар тайлбарласан ноцтой нэвтрүүлэг цацагдав. Х.Баттулга анх сонгуульд нэр дэвшихдээ оффшор бүсээс мөнгө оруулж ирнэ хэмээн бүр АТОЗ хөдөлгөөнтэй гэрээ байгуулж байв. Гэвч оффшор бүсээс өнөөдрийг хүртэл 4 жилийн хугацаанд нэг ч төгрөг, доллар оффшор бүсээс орж ирээгүйг Сангийн сайд асан Ч.Хүрэлбаатар хэдэнтээ мэдэгдэж байлаа.
Ерөнхийлөгч Х.Баттулгын өмнөх Засгийн газрын тэргүүн У.Хүрэлсүх огцрох үед УИХ-ын чуулганы индэр дээрээс мэдэгдсэн Ерөнхий сайд асан Сү.Батболдтой холбоотой мэдэгдлийн хөзөр гэж энэ нэвтрүүлгийг харж болох. Гэхдээ хэр сайн хөзөр вэ гэдгийг тунгаах ёстой.
Нөгөө талаар Ерөнхийлөгчийн сүүлийн үеийн эдгээр үйлдлүүд хэр зөв бэ, ёс зүйтэй эсэх, цаашлаад хууль зөрчих үү зэрэг асуултууд ч гарч ирж байна. Хамгийн гол нь Монгол түмний эв нэгдлийн билэгдэл болдог Ерөнхийлөгчийн албан тушаалтай хүн өөрийн эрх ашгийн төлөө ийнхүү хуулийн дээд байгууллага Цэц дээр очиж хууль тайрбарлаж, нэг хүний төлөө Тамгын газрын даргаараа хэрэг тайлбарлуулан суух нь зөв үү.
Магадгүй Х.Баттулгын эдгээр хөзрүүд хожил биш эзэндээ хожигдол авчирч мэднэ.
Эх сурвалж: shuurhai.mn Г.ОЧИР
