Хүчтэй шуурганы улмаас ОХУ-ын хилээс нааш 10 км-т 110 кВт-ын с-458 ЦДАШ -ын 216 дугаар тулгуур хугарч унан, аваарын нөхцөл байдал үүссэн тул Баруун бүс нутгийн хэрэглэгчдийн цахилгаан эрчим хүч тасраад байна.
Энэхүү нөхцөл байдлыг эргүүлэн хэвийн болгохоор шуурхай ажлын бригад бэлтгэл ажлаа ханган ажиллаж байна хэмээн Баруун бүсийн эрчим хүчний систем ТӨХК өөрийн цахим хуудастаа мэдээлжээ.
Энэ талаар тус газрын Инженерийн албанаас тодруулахад "Ховд, Увс, Баян-Өлгий аймгийн төвийн нэгдүгээр зэргийн хэрэглэгчдийг Дөргөний цахилгаан станцаас эрчим хүчээр хангаж байна. Аваарын нөхцөл байдалд бид шуурхай арга хэмжээ авч байна. Одоогоор хэдэн өрхийн цахилгаан тасарсныг хэлэх боломжгүй байна" гэв.