АНУ-д суугаа Элчин сайд Ё.Отгонбаяртай холбоотой хэд хэдэн асуудал дэгдээд буй.
Ерөнхийлөгчийн зүгээс түүнийг Элчин сайдаас нь эгүүлэн татах албан бичгийг УИХ-д даргад хүргүүлээд байгаа юм. Тус албан бичигтээ Монголын ноос ноолууран бүтээгдэхүүнийг АНУ-д сурталчлах хууль батлуулах ажилд идэвхтэй оролцоогүй, оффшор бүсээс мөнгө оруулж ирэх асуудалд санаачилгатай ажиллахгүй байгаа гэх утга бүхий үндэслэлийг бичсэн байдаг.
Түүнчлэн энэ үйл явдлын дараа Ё.Отгонбаярын Колумбын их сургууль руу илгээсэн захидал ил болж тус захидалд “Би танай сургуультай илүү нягт хамтран ажиллахыг тэсэн ядан хүлээж байна. Амласны дагуу би тан нарт Батболдын Сэдбазарын наматрын илгээж байна. Миний хэлсэнчлэн тэр бол миний эртний найз болон Ерөнхий сайд Батболдын хүү юм. Гэхдээ та бүхэн түүний намтрыг харвал тэр спорт, олон нийтийн үйл ажиллагааны амжилтаараа өндөр үнэлэгдэх болно. Би таны зөвлөгөөг тэсэн ядан хүлээж байна” гэсэн байгаа юм.
Харин өнөөдөр УИХ дахь МАН-ын бүлгийн дарга Д.Тогтохсүрэн сэтгүүлчийн асуултад хариулахдаа "Элчин сайд Ё.Отгонбаяртай холбоотой асуудлыг өнгөрсөн баасан гарагт УИХ-ын Аюулгүй байдлын байнгын хорооны хуралдаанаар хэлэлцсэн. Хуулиараа долоо хоногийн дотор Байнгын хороо хэлэлцэх ёстой. Байнгын хорооноос Элчин сайд Ё.Отгонбаярыг эгүүлэн татах нөхцөл үүсээгүй байна гэж үзсэн" гэв.
Эх сурвалж: shuurhai.mn Г.ОЧИР
