АН сэргэхгүйгээр унаж байна. Ард түмний дунд “Эрт урьдын цагаан морин жилд” хэмээн эхлүүлдэг үлгэр болж үлдэхэд энүүхэнд иржээ. Үүнийг батлах үйл явдлууд өдөр бүр хөвөрч, АН амь тавьж байна.

30 жилийн өмнөх цагаан морин жил Монгол даяар эхэлсэн ардчилсан хувьсгал, түүнээс эхтэй АН энэ цаг үед монгол түмний элэг доог болж буй.

Хүнээр бол идэр нас, амьдрал эхлэх цаг дор ийнхүү боловсон хүчний доройтолд орж, үг хэлээ ололцохоо байж, бүр хоёр хэсэгт хуваагдан даргын сунгаагаа эхлүүлж байгааг ойлгох ухаан монгол түмэнд битгий хэл ардчилал эхэлсэн АНУ-д ч үгүй биз.

С.Эрдэнэ, Ц.Туваан гэдэг хоёр хүн дээр фокусласан намын хувь заяаг хууччуул, УИХ-д суусан гишүүд нь ч анзааргагүй сууцгаасаар байсан нь  хачирхалтай. Харин өчигдөр АН-ын хувь заяаг хуваагаад байгаа хоёр тал уулзалдаж, дээр нь УИХ-ын гишүүд ч нэмэгдэж, хатуухан уулзалт болсон талаарх мэдээлэл байна. Үүнийг батлах уулзалтын зураг ч гарч ирээд байгаа юм. Энэ уулзалтаар намын даргын сунгаагаа нэгтгэж, Ерөнхийлөгчийн сонгуульд нэр дэвшигчээ тодруулах тал дээр санал гарсан ч шийдэлд хүрч чадаагүй байна.

Тиймээс өнөөдөр дахин уулзалт зохион байгуулж шийдвэрт хүрэхээр болсон гэх. Гэвч өнгөрсөн хугацаанд салж нийлж хэдэндээ үзсэн тус намынхны талаар энэ уулзалт үр дүнд хүрнэ гэдэгт эргэлзэх хүмүүс олон байна.

Эх сурвалж: shuurhai.mn Г.ОЧИР