Өвөрхангай аймгийн Хужирт сумын Сэмжид рашаан сувиллын газарт амраад буцсан иргэдээс коронавирусийн сэжигтэй тохиолдол батлагдсан талаар бид мэдээлээд байгаа билээ.

Тэгвэл тус аймгийн Онцгой комисс дөнгөж сая олон нийтэд мэдээлэл өглөө.

Анх амралтад амраад буцсан Увс аймгийн харьяат гэр бүлийн 3 хүн нутагтаа очоод шинжилгээ өгөхөд сэжигтэй буюу сул эерэг гарсан мэдээллийг өнөөдөр өглөө авчээ. Тэдгээр иргэд энэ сарын 15-21-ний хооронд амраад буцсан байна.

3 сарын 1-нээс хойш тус амралтад нийт 242 хүн амарсан бөгөөд 178 иргэн Улаанбаатар болон 12 аймагт буцжээ.

Өвөрхангай аймгийн 4 суманд нийт 50 хүн гэртээ харьсан гэнэ. Тэдгээр иргэдээс өнөөдөр түргэвчилсэн оношлуураар шинжилгээ хийхэд Хархорин суманд 4, Арвайхээр суманд 1 сэжигтэй тохиолдол гарчээ.

Түүнчлэн Сэмжид хужирт сувилалд одоогоор амрагч 64, ажилтан 23 байгаа бөгөөд тэдгээрээс авсан шинжилгээгээр 9 хүнийнх нь хариу сул эеорэг буюу сэжигтэй гарчээ. Нийтдээ 14 иргэн сул эерэг буюу сэжигтэй бүртгэгдээд байгааг аймгийн Онцгой комисс онцоллоо. Тэдгээр иргэдийн сорьцыг Улаанбаатар руу ХӨСҮТ рүү тээвэрлэх ажлыг эхлүүлсэн гэлээ.

Халдвар гарсантай холбогдуулан

-Өвөрхангай аймгийн Арвайхээр, Хархорин, Бат-Өлзий, Хужирт сумдын орох гарах хөдөлгөөнийг 03-р сарын 23-ны 06:00 цагаас эхлэн 7 хоногийн хугацаатай хаах

-Дээрх сумдын доторх авто машины болон иргэдийн хөл хөдөлгөөнийг бүрэн хориглох

-Төрөл бүрийн худалдаа, үйлчилгээний байгууллагын үйл ажиллагаа, олныг хамарсан арга хэмжээг бүрэн хориглох

-Бүх шатны боловсролын байгууллагын үйл ажиллагааг 7 хоногийн хугацаанд зогсоох

-Төрийн байгууллагууд ажилтнуудынхаа 5-10 хувийг ажиллуулах шийдвэр гаргажээ.