Зайсан дахь орон сууцны хотхонд хоёр хоногийн өмнө тарвага орж ирсэн нь олны анхаарлыг татаад байгаа. Мөн өдөр газар хөдлөлт болсон нь ан амьтад мэдэрсэн хэмээх хүмүүс байгаа. 

Тарвага ийнхүү суурьшил бүс рүү орж ирсэн асуудлаар Богд уулын дархан цаазат газрын хамгаалалтын захиргаа "Тарваганы орооны үе одоо тохиож байна. Энэ үед эр тарваганууд хоорондоо барилдаж байгаа мэтээр хүчээ үздэг. Хүчээр илүүрхсэн нь эм тарвагатайгаа хамт нүхэндээ үлдэж, чадал багатайгаа нүхнээсээ хол хөөн явуулдаг.

Хөөгдсөн тарвага орох газар хайн явахдаа тухайн хотхоны хашаанд орсон байсан. Энэ нь байгалийн жамаар тохиолдож буй үзэгдэл юм. Хөөгдөн гарсан тарваганууд шинээр нүх ухаж, бүл үүсгэх эсвэл өөр амьтны идэш болох тохиолдол бий. Орон сууцны хотхонд орж ирсэн тарвага уул руугаа буцсан.

Түүнчлэн Нийслэлийн нутаг дэвсгэр дээр тарвага орсон гэж үзэж болохгүй. Учир нь Зайсангийн ам бол амьтад амьдрах бүс. Амьтдын амьдрах газар, нүүдлийн замд нь хүмүүс амьдарч байна. Иймд урин дулааны цагт Зайсангийн ам орчмын хотхон, хороололд амьтан орж ирлээ гэх дуудлага нэмэгддэг" гэв.

Харин газар хөдлөлтийг тарвага мэдэрсэн байх боломжтой гэх асуултад тэрбээр "Газар хөдлөлтийг түрүүлж мэдрэх магадлалтай амьтдын нэг нь тарвага мөн. Гэхдээ минут орчмын өмнө мэдэрч нүхнээсээ гардаг. Хэдэн цагийн өмнөөс мэдэх боломжгүй" гэсэн юм.