УОК-ын дарга С.Амарсайхан саяхан Эрүүл мэндийн яаманд ажиллах үеэр "ХӨСҮТ-ийн ажилтан коронавирусийн шинжилгээг сөрөг гаргаж зардаг, нөхрийнхөө өмнөөс шинжилгээ өгсөөр эцэст нь өөрөө эерэг гарсан. Ийм зүйл байж болохгүй" хэмээж байв.
Үүнээс үүдэж нийгэмд ийм маягаар халдварын тархалт нэмэгдэж байна гэсэн хандлага сүүлийн хэд хоногт давамгайлж байна. Тэгвэл энэ асуудлын эзэн олдохгүй байгаа талаар ХӨСҮТ-ийн Үйлдвэрчний хорооны дарга А.Батчулуун хэвлэлд ярьжээ.
Тэрээр "Шадар сайдын тухайн мэдээллийн дагуу бид асуудалд холбогдсон эмнэлгийн ажилтанг хайгаад олоогүй. Манай эмнэлэгт ийм асуудал үүсгэх ажилтан байна гэдэгт итгэхгүй байна. Хэн тийм асуудалд холбогдсон талаар удирдлагуудын зүгээс ямар ч мэдээлэл өгөөгүй. Бид ч дотроо хайгаад олоогүй.
Батлагдаж, нотлогдоогүй мэдээллийг олон нийтэд цацаж, эмч, эмнэлгийн ажилтнуудын нэр хүндэд халдаж байгаад харамсаж байна. Тухайн мэдээллийн дараа нэр бүхий хэвлэл мэдээллийн хэрэгслээр ХӨСҮТ-ийн албан тушаалын болоод тухайн асуудалд холбогдсон гэх хүний нэрний эхний үсгүүд мэдээлэгдсэн. Тиймээс тухайн ажилтнууд С.Амарсайхан сайдын мэдээллийг болон өөрсдийгөө шалгуулахаар цагдаагийн байгууллагад хандаад байгаа" гэжээ.
Эх сурвалж: shuurhai.mn Г.ОЧИР
