УИХ 2017 оны тавдугаар сарын 25-нд Ё.Отгонбаяр тэргүүтэй хүмүүсийг Элчин сайдаар томилсон. Гэвч Ерөнхийлөгч тэднийг эцэслэн томилох зарлиг гаргаж, Итгэмжлэх жуух бичигт нь гарын үсэг зурахгүй байсаар өнөөдрийг хүрсэн. Харин Монгол Улаас АНУ-д суух Элчин сайдаар томилогдсон БСШУС-ын дэд сайд Ё.Отгонбаярыг саяхан явуулах шийдвэр гаргасан юм. Тиймээс Ё.Отгонбаяр дэд сайдын ажлаа хүлээлгэн өгчээ.Ерөнхийлөгч байр сууриа өөрчилж, түүнийг Элчин сайдаар явуулах шийдвэр гаргахад хэд хэдэн хүчин зүйл нөлөөлсөн гэх мэдээлэл бий. Тодруулбал, АНУ өөрийн улсад нь суух Элчин сайд нарын Итгэмжлэх жуух бичгийг жилд хоёр буюу гурав болон есдүгээр сард хүлээн авдаг ажээ. Энэ сарын сүүлчээр шинээр томилогдон ирж буй Элчин сайд нараа хүлээн авахаар төлөвлөж байгаагаа манай талд анхааруулжээ. Мөн энэ оны эхний хагаст АНУ-ын Мянганы сорилтын корпорацитай компакт гэрээ байгуулахад Элчин сайдын үүрэг их. Түүнчлэн Ерөнхийлөгч Х.Баттулга энэ зун АНУ-д айлчлах тухай мэдээлэл бий. Тиймээс айлчлахаасаа өмнө Элчин сайдаа томилох шаардлагатай болсон зэрэг цаг хугацаанд шахагдсан асуудлууд байгаа учраас өөр хүнийг Элчин сайдаар томилоход хугацаа алдана гэж үзсэн бололтой.
