Автомашины осолд орсон 80 настай иргэн нас барсан харамсалтай хэрэг гарчээ. Осол өнгөрсөн 5-р сарын 15-нд гарсан байна. Талийгаач биедээ олон гэмтэл эмнэлэгт эмчлүүлсэн ч тусыг олоогүй байна.
Уг осолд АШУҮИС-ийн захирал Г.Батбаатар холбогджээ. Энэ тухай талийгаачийн хүү Ц.Ариунболд хэвлэлд ярьжээ. Тэрээр "Тавдугаар сарын 15-ны өдөр өглөөний 10 цагийн үед тээврийн хэрэгслийн хөл хөдөлгөөн багатай үед 80 настай аавыг минь Ланд 200 машинаар мөргөж унагасан. Энэ тухай арын машины хүмүүс надруу ярьж мэдээлэл өгсөн. Тэр үед Г.Батбаатар бол надруу яриагүй. Тухайн үед замын хөдөлгөөнд орж байсан өөр машины жолооч осол гарсан талаар над руу мэдээлсэн. Улмаар түргэний машин яаралтай ирээд аавыг ГССҮТөв рүү авч явсан байна. Сэхээнд 15 гаруй хоног, тасагт 10 гаруй хоног байж байгаад зургадугаар сарын 15-ны өдрөөс эмнэлгээс гарсан. Эмнэлгээс гарах болсон шалтгаан нь хөгшин настай хүн удаан хэвтэхээр уушгинд ус дүүрчидэг юм байна.
Тиймээс эмнэлгээс гаргасан. Үргэлжлүүлэн хувийн эмнэлэгт хэвтүүлсэн боловч сэтгэл санаа, биеийн байдлаас болж гэртээ гаргаж авсан. Түүнээс биш эмчилгээг дуусаж, эрүүл болоод гараагүй. Аавын маань бүх яс нь хугаралттай, хүзүүний 4-5 үед хугарсан байсан. Г.Батбаатарын хувьд тухайн өдрөө ГССҮТ-т ирээд нэг уулзсан. Тэрнээс хойш уулзаагүй байгаа. Би утсаар яриад эмчилгээний зардал ийм болж байна гэсэн чинь би өмгөөлөгч авсан. Эндээс хойш баримтаа цуглуулаад манай өмгөөлөгчтэй л уулзана шүү. Шүүх дээр уулзана гэсэн. Хамгийн гол асуудал бол эмчилгээний мөнгөний асуудал биш байгаа юм. Энэ хүний сэтгэл л байгаа. Гэтэл АШУҮИС-ийн захирал Г.Батбаатар ааваас минь уучлалт ч гуйлгүй байсаар өнөөдөр өнгөрчихлөө. Үнэхээр их харамсаж байна" гэжээ.
