Цахим сүлжээнд "Нүдэнгоо" хэмээн зохиолын дууны клип цацагдаж олны анхааралд ороод байна. Насанд хүрэгчдэд зориулсан, садар самуун сурталчилсан хэмээн буруутгах хандлага дийлэнх байна. Уран бүтээлийнхээ талаар дуучин Б.Баяр-Отгон тайлбар хийжээ.
Тэрээр "Клипийг нь карантины үеэр хийсэн юм. Тэгээд бэлэн болгосон байсныгаа сая хөдөө явахдаа фэйсбүүк дээрээ тавьчихаад гарчихсан юм. “Нүдэн гоо” гэхээр заавал нүдтэй холбоотой, дээлтэй, морьтой хүүхэн гарч ирээд нүдээрээ инээх албагүй шүү дээ. Өмнө нь яахав дээлтэй, морь унасан бүсгүйчүүдтэй клип хийж л байсан. Тэгээд телевизүүд HD болоод миний “Нүдэн гоо” дууны хуучин клип чанарын шаардлага хангахгүй болсон. Тиймээс бодож байгаад шинэчилсэн. Энэ дууны шүлэг бол эмэгтэй хүний гоо сайхныг магтсан агуулгатай юм.
Түүнээс биш буруу үлгэр дуурайлал үзүүлсэн, садар самуун сурталчлах гэсэн утга санаа, зорилго ердөө байхгүй. Хүмүүс “Нүдэн гоо” гэхээр заавал нүдний тухай дуу байх ёстой гэж бодоод байх шиг байна. Уг нь шал ондоо хэлбэрээр хийе гэж бодсон клип юм" гэжээ.