Сүүлийн үед УБТЗ-ын асуудал олны анхаарлыг татаж, улс хооронд дуулиан болоод байгаа. Гэхдээ энэ дуулианыг ОХУ-ын талд намжааж, "ган бат найрамдал"-ыг сэргээх ганц л хүн бий.
Тэр нь С.А.Павлов. Тэр РЖД буюу Оросын төмөр замууд нийгэмлэгийн Тэргүүн дэд ерөнхийлөгч бөгөөд УБТЗ-ын ТУЗ-ийн дарга, ОХУ-ын Засгийн газрыг төлөөлөн Монголын төмөр замчидтай харилцдаг номер 1 хүн. Үндсэндээ түүний амаар л оросууд монголчуудын талаар, Монгол дахь төмөр замын мэдээллийг хүлээж авдаг гэж болно. С.А.Павловын намтрыг харвал “РЖД Интернэшнл” компанийг олон жил удирдсан, гадаад дахь Оросын төмөр замын хөрөнгө оруулалтын чиглэлээр сайн ажиллаж мэргэшсэн, ТЭЗҮ, хөрөнгө оруулалтын чиглэлээр тэндээ бол шилдэг лидер гэдгээрээ хүлээн зөвшөөрөгдсөн нөхөр. Оросын төмөр замын акулууд болох И.В.Якунин, В.Н.Морозов, А.А.Красношек, А.С.Мишарин нар тэтгэвэрт гарснаас хойш ийнхүү гарч ирж буй дунд үеийн төлөөлөл.
Монгол Улсаас ОХУ-д суугаа Онц бөгөөд бүрэн эрхт элчин сайд Д.Давааг хоёр цагийн турш бараг л "хөрөөдсөн" С.А.Павловын яриа, түүний монголчуудад, дэд бүтцийн салбарт хандаж хэлснийг хэдэн зүйлээр сийрүүлэн хүргэе
Зам тээврийн хөгжлийн сайд Л.Халтарыг хорлон сүйтгэгч гэв
Үнэхээр ойлголцож чадахгүй бөгөөд ойлголцлын хил хязгаараа давсан хүний үг. Оросууд энэ хэмжээний үг хэлнэ гэдэг нь чамтай ахиж ярихгүй, дараагийн хүнээ аваад ир гэж буй хэрэг. Хорлон сүйтгэх ажиллагаа гэдэг нь Дэлхийн II дайны үед Орос хэлэнд идэвхтэй хэлэгдэх болсон бөгөөд энэ хэмжээний үнэлэлт, дүгнэлт авах нь Гитлерийн Германтай адил дүн авсантай ижил бөгөөд эцсээ хүртэл үзэлцэнэ гэдгээ л илэрхийллээ гэж ойлго.
Монголын талаас Замын даргад нэр дэвшүүлэгчид чинь гологдоод байна
Үнэндээ ч онигоо цаашаа л юм болж байна. Өдгөө 16.000 ажилтантай яруу алдарт УБТЗ-ын хэмжээнд Шүүхээр ял шийтгүүлж явсан Г.Сэрээнэндорж, Сэлэнгэ аймгийн өртөөний даргаар ажиллаж явсан 1986 оны жаалаас өөр хүн олдохгүй байна гэдэг нь өөрөө гутамшиг. Харин сүүлд Ц.Хүрэлбаатарын нэр явсан гэдгийг “хорлон сүйтгэгч” нэр аваад байгаа сайд хэлсэн билээ.
Тэгвэл Ц.Хүрэлбаатар нь одоогоор Нийгмийн асуудал эрхэлсэн замын орлогч дарга бөгөөд Эрхүүд политехникийн сургууль төгссөн байдаг. Энэ нь ахиад л оросуудын шаардлагыг хангахгүй гэсэн үг юм. Тэд эхний ээлжинд ашиглалтын эсвэл холбооны инженерийг хүлээн зөвшөөрөх талтай. Түүнээс биш нийгмийн асуудал эрхэлсэн хүнийг дэмжээд явах нь юу л бол. Бас л чамлалттай.
Үүнээс гадна Тарифаа нэм, Монп1, Монп2 гэсэн хоёр өрийг цайруул гэх зэргээр үнэндээ Л.Халтарын дааж давашгүй болзлуудыг тулгасан байна. Л.Халтарын хувьд энэ нь даашгүй ачаа хэдий ч хуучин сайд Б.Энх-Амгалангийн хувьд тал хагасыг нь ч гэсэн болгочихсон гавъяатай юм.
Богд ханы төмөр замд Оросын компаниуд оруулахгүй бол холболтын цэг өгөхгүй
Энэ бол үнэндээ Л.Оюун-Эрдэнийн хувьд сүйрэл. "Голомт"-ын Д.Баясгалан авсан сурагтай. Хэдийдээ ямар шалгуураар авчихсан юм бүү мэд. Гэхдээ энэ намартаа багтааж бүтээн байгуулалтын ажил эхлүүлнэ гэж мэдэгдсэн нь оросуудтай дайн зарлаагүй ч дайтаад эхэлсэн гэж хэлж болно.
Оросууд бол Рио Тинто биш. Шууд л нүүр лүү "шаана". С.А.Павлов хэлэхдээ АО РЖД строй, АО РазвИН гэх РЖД-ын охин компаниуд Монгол Улсад байсаар байтал яагаад биднээс мэдээллээ нуугаад, ярилцаж хэлэлцэхгүй, ТЭЗҮ, төсөөллөө ч ядаж ярихгүйгээр шууд ингээд явчихав аа хэмээн мэл гайхаж, цэл хөхөрч ЗТХЯ болон түүний сайдыг үнэхээр ойлгохгүй байгаагаа илэрхийллээ. Эцсийн эцэст Богд уул тойруулаад өөрсдөө өөр зам тавь, эсвэл бидэнтэй нийлээд ажилла, үгүй бол овоолсон шороогоо тэврээд үлд гэж хатуу хэллээ.
Оросын тээврийн сайд ч “Оросуудыг тоохгүй бол монголчуудыг орхи” гэжээ Путины шадар 3 цэрэг нь РЖД О.В.Белозёров, Ростех С.В.Чемезов, Роснефть И.И.Сечин нар. Тэдний доор Газпром зэрэг аварга компаниуд, Оросын банк санхүүгийн нэгдэл бүгдээрээ эгнэн жагсаж байдаг. Гэтэл юу болох нь энэ вэ?
С.А.Павлов нь Газпромын ТУЗ-ийн дарга В.А.Маркеловт монголчуудын ямар хариуцлагагүй, хамтын удирдлагын наад захын соёлгүй Л.Халтар зэрэг үл бүтэх сайд нартай яаж үгээ барж, үйлээ идэж байгаа тухай, Монгол Улсын Засгийн газрын үнэн нүүр царайг хэлэхэд цочирдон хүлээн авсан тухай мөн Москвад суугаа БНХАУ-ын Элчин сайдын яамтай ХангиМандалын төмөр замын тухай ярьсан гэдгээ дахин дахин Хятадын Элчин сайдтай Монгол дахь төмөр замын асуудлаар уулзаж ярилцана гэдгээ ч хэлээд авав.
Харин Монгол Улс эдгээр хоёр улсын хоорондын яриа, РЖД-ээр дамжин Газпром улмаар Роснефтьтэй харилцаа маш хүнд болж байгааг Л.Оюун-Эрдэнэ Ерөнхий сайд маань мэддэг л байгаа даа.
В.В.Путин зөвхөн РЖД-г л сонсож Монголтой юм ярина
Бүүр муу мэдээ бөгөөд маш муу ирээдүй эндээс харагдаж байна. Өмнө нь монголчууд Зүүнбаянгаас Таван толгой чиглэлийн төмөр зам дээр 50 хувь хийж орох байр сууриа удаа дараа илэрхийлж УБТЗын ТУЗ-өөр дамжуулан ихээхэн санаачилгатай ажилласан байдаг.
Гэхдээ тухайн үеийн Ерөнхийлөгч Х.Баттулга, ЗТХ сайд Б.Энх-Амгалан нар Орос овсгоо гаргаж зөвхөн оператор хийлгэх зөвшөөрөл амаар өгч, холболтын цэгээ авч дуусгасан байдаг. Тухайн үед УБТЗ-ын ТУЗ-ийн дарга А.С.Мишариныг монголчуудтай муу ойлголцож ажиллалаа гэдэг шүүмж өрнөж удалгүй тэтгэвэрт нь гаргаад санаа амарсан байна. Харин энэ удаад оросууд ялангуяа С.А.Павлов өмнөх алдааг давтахгүйгээр Ханги-Мандал, Богдханы төмөр зам дээр РЖД-ын оролцоог заавал хангаж ажиллах үүрэг даалгавар авсан нь илт байгаа юм.
Ерөнхийлөгч У.Хүрэлсүхтэй Оросын Ерөнхийлөгч утсаар ярихдаа төмөр замын талаар ганц ч үг ган хийгээгүйг Монголын төмөр замын асуудлыг толгой даан шийдэж мэдэж байгаа С.А.Павлов хариуцлагатайгаар хэлсэн бөгөөд “Би сайн юм яриагүй цагт Путин ерөнхийлөгч хэзээ ч сайн үг дуугарахгүй” гэдгээ тэнэг хүнд ч ойлгогдохоор хэлээд өглөө.
Орос Хятадтай харилцах харилцаа нь Монгол Улсын хамгийн чухал харилцаа бөгөөд Япон, Америк зэрэг бусад орнууд бол дараагийн асуудал байдаг. Хуурай газраар хиллэн оршдог мөнхийн хөршүүдтэйгээ бид 1000 удаа муудаж, 1001 удаа сайдсан байдаг.
Харин Л.Халтарын үе шиг ийм дорой байдалд орсон түүх сүүлийн Ардчилсан 30 жилийн хугацаанд байгаагүй. Одоогийн байгаа Монгол Улсын Засгийн газар урд, хожид байгаагүй чадваргүй ажиллаж байгааг мэргэжлийн олон салбарууд бүх цаг үеийн сайд нар, одоогийн УИХын гишүүд ч хатуу ширүүнээр шүүмжилж байна. Хариуцлага алга. Хариуцлага тооцох хүн ч алга. Уг нь анх хариуцлага ярьж гарч ирцгээсэн.
Оростой харилцах харилцаа бол тэргүүн зэргийн харилцаа мөн бөгөөд монголчуудыг хатуу ширүүн үгээр бөмбөгдсөн РЖД Тэргүүн дэд ерөнхийлөгч С.А.Павловт баяр хүргэх ёстой болохоос шүүмжлэх арга алга. Оросын төрийн байгуулалт маш өвөрмөц бөгөөд Монголыг хариуцсан хүн юм ярьж байхад түүний үгнээс зөрж, өөр байр суурь илэрхийлэх орос энэ дэлхий дээр байхгүй. В.В.Путин ч түүний л үгийг сонсоно. Түүнд харин ч талархал дэвшүүлж Монгол Оросын харилцаанд цав суулгасан тааламжгүй этгээд Л.Халтарт хариуцлага тооцох нь зүйтэй юм.
Эх сурвалж: Erennews.mn
