МОСКВА. /RIA Novosti/. Даваа гаргийн арилжааны явцад биткоины ханш 2.27 хувиар өсөж, 50 мянган ам.доллар давжээ.
Биткоины ханш тавдугаар сарын 15 -наас хойш анх удаа 50 мянган долларыг давж буй юм. Арилжааны хэмжээгээр хамгийн томд тооцогддог “Binance” криптовалютын бирж дээр биткоины ханш 2.5 гаруйхан хувиар өсөж, 50 мянга ам.доллароос дээшилсэн байна. Гэвч удалгүй буурч, 49.9-49.8 мянга ам.долларын хооронд хэлбэлзжээ.
Хорь гаруй биржийн дундаж үнийг тодорхойлдог “CoinMarketCap” цахим хуудсанд мэдээлснээр, биткоин 2.33 хувиар өсөж, 49 915 ам.долларт хүрсэн байна.
Биткоины ханш хаврын сүүлчээр огцом унасныхаа дараа өсөж байгаа юм. Өнгөрсөн тавдугаар сард уг криптовалютын ханш 57.7 мянгаас 37.3 мянга болж буурсан бол зургаадугаар сард ханш мэдэгдэхүйц өөрчлөгдөөгүй боловч долоодугаар сарын хоёрдугаар хагасаас хойш биткойны ханш таван долоо хоног дараалан өсжээ.
Д.Жаргал
Эх сурвалж: "Монцамэ" агентлаг
