АН-ын ротацийн санал хураалт энэ сарын 25-нд болно. Бас л будлиан үүсэх шинжтэй. Төв намаас анхан шатны үүрүүддээ намын гишүүдийнхээ шинэчилсэн бүртгэл, саналын эрхтэй гишүүдийн албан ёсны бүртгэлийг өгөөгүй байгаа нь будлиан болохын нэг томоохон дохио болж байна. Нэгэнт төв нам нь саналын эрхтэй гишүүдийн бүртгэлээ анхан шатны байгууллагуудтайгаа тулгаж үзээгүй тул БЗД-ын 23 дугаар хорооны Ардчилсан намын үүрийн дарга, дүүргийн намын хорооны гишүүн Д.Энхтүвшин нарын зэрэг идэвхтэй хэсэг нь саналын эрхтэй гишүүн нэг бүрийнхээ гарын үсэгтэй бичгийг С.Эрдэнэ даргадаа хаяглан хүргүүлжээ. Гэвч С.Эрдэнэ даргын албатууд нь ямар ч арга хэмжээ авсангүй.
Ер нь АН-ынхан дүрмээ шинэчилж, удирдлагуудаа сольсноос хойшхи хугацааанд шинэчлэлийн дорвитой юм харагдахгүй байна. Нөгөө л бахь байдаг бүлэглэлүүдийн хуйвалдаан, талцал, элдэв хор найруулга, захиргаадалтын үеийн явуургүй арга барилаар ажилласан хэвээрээ ажээ. Уг нь С.Эрдэнэ намын даргаар сонгогдож гарч ирсэнийхээ дараахан “Гишүүдээ сонсож, тэднийхээ эрх ашгийг хамгаалж, шударга ёсны төлөө тууштай ажиллана” гэх мэтээр мэдэгдэж байсансан. Гэтэл одоо мань хүн энэ намыг хувийн компани маягаар удирдах боллоо хэмээн шүүмжлэх хүн олон болоод байна. Түүний иймэрхүү мугуйдлал нь тус намын дотоод хяналтын байгууллагад өөрийн үзэмжээр, урьд өмнө янз бүрийн үл бүтэх үйлдлүүдэд нэр холбогдож явсан этгээдүүдийг хүчээр оруулах зэрэг дүрмийн бус олон үйлдлээр илрэх болж, шударга гишүүд нь шаардлага, уриа лоозонгоо бариад намынхаа байрны үүдэнд байнга жагсдаг болжээ.
Мөн С.Эрдэнэ нь Баянзүрх дүүргийн АН-ын Хэрэг эрхлэх газрын даргаар урьд нь хар тамхины хэрэгт хоёр ч удаа орооцолдож явсан М.Бадрах гэгчийг томилсон нь одоо бөөн хэл ам, хэрүүл шуугиан үүсгээд байна. Тэсгэн атлаа харин Дүүрэг, Нийслэлийн Иргэдийн төлөөлөгчдийн хурлын төлөөлөгчөөр удаа дараа сонгогдон муугүй ажиллаж байгаа БЗД-ын АН-ын гишүүн Т.Батцогтыг Үндэсний бодлогын хорооны гишүүнд нэр дэвшигчдийн нэрсийн жагсаалтаас ямарч үндэслэлгүйгээр шууд хассан байх жишээтэй. Иймд Баянзүрх дүүргийн АН-ын хорооны гишүүд нь С.Эрдэнэ болон Ерөнхий нарийн бичгийн дарга Ц.Туваан, Дотоод сонгуулийн хорооны дарга И.Мөнхжаргал нарт таван зүйл бүхий шаардлага хүргүүлжээ.
Ротацид нэрээ дэвшүүлсэн БЗД-ийн АН-ын гишүүн гэх зарим нэр дэвшигчдийн дотор бас ихээхэн эргэлзээтэй хүмүүс ч цөөнгүй байна. Энэ тухай шударга гишүүдийнх нь дунд "Нэр дэвшигч Нямдорж, Ганхуяг, Мөнх-Эрдэнэ, Бадрах зэрэг МАН-ын бууны ноход буюу тус намын захиалгаар АН-ынхаа дотор хор найруулж явдаг, духан дээрээ "шинэчлэгч" гэсэн хуурамч пайз зүүсэн хүмүүс хот, дүүргийн намын хорооны гишүүн болох юм бол намын хагарал улам даамжирна" хэмээн халаглаж, харамссан яриа хөөрөө газар авч байгаа аж. Тэдний үнэлэмж үнэний ортой болов уу. Тэдгээр үл бүтэх хүмүүс нь саналын эрхгүй буюу гишүүний татвараа төлөөгүй хүмүүсийг бугуйлдаж аваад "Бид та нарын татварыг төлчихнө. Тэгээд саналын эрхтэй болоод бидний төлөө санал өгөөрэй" гэх мэтээр хуйвалдаанаа хийж эхэлжээ. Эндээс анзаарахад төв намаас нь саналын эрхтэй гишүүдийн нэгдсэн бүртгэлийг анхан шат руугаа явуулж тулгалт хийгээгүй нь тэдний ийм луйврыг далдуур дэмжсэн хэрэг болоод байна. Юутай ч саналын эрхтэй шударга гишүүд нь тиймэрхүү хорлон сүйтгэгчдийг сайн мэдэх тул тэдний төлөө санал өгөхгүй нь лавтай. АН тиймэрхүү ёс зүйгүй хүмүүсийг овоолж байдаг хогийн сав биш л дээ.
Б.Отгонбаяр
Шуурхай.мн
