БНСУ-ын Ерөнхийлөгч асан И Мён Багийг авлигын хэрэгт холбогдуулан өнгөрөгч баасан гаригт баривчилсан. И Мён Багийг баривчилсны дараа Сөүлийн түр хорих төвд саатуулсан талаар “ The Korea Times” мэдээллэсэн байна. Пүрэв гаригийн шөнө Сөүл хотын шүүхээс түүнийг эрх мэдлээ урвуулан ашиглаж, хээл хахууль авсан, татвараас зайлсхийсэн, материаллаг ашиг хонжоо хайсан зэрэг хэрэгт буруутган баривчлах зөвшөөрлийг баталсан байна.
Эдүгээ 76 настай тэрбээр 2008-2013 оны хооронд БНСУ-ын Ерөнхийлөгчөөр ажиллаж байсан бөгөөд таван сарын турш авлигын хэргээр шалгагдаж ийнхүү баривчлагджээ. Түүнийг Тагнуулын байгууллагаас хууль бусаар 11 тэрбум вон буюу 10,2 сая ам.доллар авсан хэмээн буруутгасан юм. Мөн түүнийг нууцаар эзэмшдэг компанидаа 35 тэрбум вон хууль бусаар оруулсан хэмээн сэжиглэж байгаа аж. Хэрэв түүнийг буруутгаж буй үндэслэлүүд тогтоогдвол 45 жил хүртэл хугацаагаар хорьж болзошгүй юм.
“Yonhap” агентлагийн мэдээлснээр, тэрбээр эдүгээ Сөүл хотын зүүн дүүрэгт байрладаг түр хорих байрны 12 давхар дахь 12㎡ өрөөнд ганцаараа хоригдож байгаа. Уг өрөө нь дотроо ор, зурагт, номын тавиур, угаалтуур болон бие засах өрөөтэй, бусад энгийн өрөөнүүдтэй нэгэн адил зохион байгуулалттай юм байна. И Мён Баг-д ямар нэгэн тусгай эрх ба хөнгөлөлт үзүүлэхгүй бөгөөд түүнд бусад хоригдогсдын адил хоол өгөх аж. Харин гэр бүл болон өмгөөлөгчтэйгөө өдөрт нэг удаа, 10 минут хүртэл хугацаатай уулзах боломж олгосон байна.
Эх сурвалж Шуурхай.мн
