МАН-ын 30 дугаар их хурал хоёр дахь өдрөө үргэлжилж байна. УИХ-ын гишүүн, Их хурлын тэргүүлэгч Н.Учрал үг хэллээ. Тэрбээр "МАН 100 жилийнхээ босго дээр ирсэн ч гэсэн оюун санаагаараа цэл залуу нам болж төлөвшиж чадаж байгааг хэлэхийг хүсэж байна. МАН 100 жилийн их хурлаар их хурлынхаа төлөөлөгчдийг нүүрээр нь таньж нэвтрүүлэх систем ашиглан, И-нам гэсэн аппликэйшнээр их хурлын төлөөлөгчдийг бүртгэдэг, мэдээллүүдээ гар утсаараа хүлээж аваад мэдээлэлдээ оролцдог, хариуцлагаа оноожуулж чаддаг, иргэддээ мэдээ мэдээллийг аппликэйшнээрээ дамжуулж түгээдэг залуу, цахим нам болж төлөвшиж буйгаа зуун жилийн босго дээр харууллаа.

Цаашдаа ч энэхүү оюун санааны өөрчлөлтүүдийг бид хийх ёстой. Үүнд УИХ, Засгийн газар ч тодорхой дэвшил үзүүлж, дэвшилтэт бодлогоо хэрэгжүүлж ажиллах ёстой. Барууны кинон дээр гардаг хийсвэр орчин бидний дэргэд ирсэн байна. Бидний хэрэглэдэг фэйсбүүкээр дамжуулаад хийсвэр орон зайд газар худалдаж авдаг нийгэмд бид амьдарч байна. Бидний хүүхдүүд өөр ертөнцөд амьдарч байна. Тэр шинэ үеийг ойлгодог орчин цагийн боловсрол эзэмшсэн, уламжлал шинэчлэлийн хослосон шийдвэрийг гаргадаг шинжлэх ухаанч орчин цагийн удирдагч бидэнд хэрэгтэй. Энэхүү шалгуурт орчин цагийн боловсролыг эзэмшиж чадсан Л.Оюун-Эрдэнэ дарга тэнцэж, энэхүү шинэчлэлийг хийнэ гэдэгт би эргэлзэхгүй байгаа.

Саяхан болсон Олон улсын парламентийн холбооны хурал дээр Вэб хуудас ажиллуулж иргэдийнхээ саналыг хуульдаа тусгаж байгаа. Иргэдтэйгээ хамтарч хууль санаачилж хууль боловсруулдаг болсон шүү гээд ам бардам хэлж зогсохдоо би их бахархаж байлаа. Төв Азийн цээжинд орших Монгол улс, Монголын парламент орчин цагийн хэлбэрээр ажиллаж эхэлж байгаа юм байна аа. Та бүхэнд баяр хүргэе гэж Олон улсын парламентын холбоо бидний дүгнэсэн. Энэ бол дэвшил юм аа. Энэ үеэр олон улсын социнтернийн хуралд бас суусан. Энэ социнтерний хурал дээр төрийн эрх барьж байгаа нам хүний эрхийн мэдрэмжтэй байна гэдэг хамгийн зөв шийдвэр шүү. Төрийн эрх барьж байгаа нам хүний эрхийг хүндэтгэх, хүний жам ёсны эрхийг хүндэтгэх санаачилгыг авч явдаг юм аа гэдгийг социнтерн нь ч гэсэн хэлж байсан. Тийм учраас бид цаашдаа намаа шинэчлэх, орчин цагийн дэвшилтэт шинэ бодлогуудаар бэхжүүлэх үйлсийг манлайлан хийж хэрэгжүүлэх ёстой уламжлал дээрээ суурилсан орчин цагтайгаа дүйцүүлсэн ирээдүйг харсан шинжлэх ухаанч, зөв шийдвэрүүдийг гаргахын тулд Монгол Ардын нам ирэх зуун жилд энэ их зуун жилийн эхлэлийг хамтдаа зөв тавих ийм түүхэн хурлаа гэж өнөөдрийн хурлыг дүгнэхэд таатай байна аа. " гэв.