ХНХЯамны Хөдөлмөрийн аюулгүй байдал, эрүүл мэндийн төв нь Япон олон улсын хамтын ажиллагааны байгууллага /JICA/-тай хамтран “Барилгын салбарын хөдөлмөрийн аюулгүй байдлын менежментийн чадавхийг бэхжүүлэх төсөл”-ийг 2017 оноос хойш хэрэгжүүлж байгаа.
Энэхүү төслийн хүрээнд Хөдөлмөрийн аюулгүй байдал, эрүүл мэндийн төвд “БАРИЛГЫН САЛБАРЫН ХӨДӨЛМӨРИЙН АЮУЛГҮЙ БАЙДАЛ, ЭРҮҮЛ АХУЙН УРЬДЧИЛАН СЭРГИЙЛЭХ ЧИГЛЭЛЭЭР АЖЛЫН БАЙРНЫ ХӨДӨЛМӨРИЙН НӨХЦӨЛИЙН ҮНЭЛГЭЭ ХИЙХЭД ШААРДЛАГАТАЙ БАГАЖ, ТОНОГ ТӨХӨӨРӨМЖ”-ийн санхүүжилтийг шийдвэрлэж өгөхөөр болсон юм.
Тэгвэл энэхүү тоног төхөөрөмжийг /2021.12.07/-ны өдөр гардуулан өглөө. Арга хэмжээнд ХНХЯамны Хөдөлмөрийн аюулгүй байдал, эрүүл ахуйн хөгжлийн хэлтсийн дарга З.Бауыржан, Хөдөлмөрийн аюулгүй байдал, эрүүл мэндийн төвийн дарга М.Даваабат, тус газрын дарга Ц.Янжинлхам, Төслийн зохицуулагч Окүмацү Хидэки нар оролцлоо.
Энэ үеэр ХАБЭМТөвийн дарга М.Даваабат “Монгол Улсад сүүлийн жилүүдэд хөдөлмөрийн нөхцөлийн үнэлгээ хийлгэх хүсэлтэй байгууллагын тоо нэмэгдэж байгаа. Энэ нь аж ахуйн нэгж байгууллагууд ажилчдынхаа эрүүл аюулгүй орчин нөхцөлд анхаардаг болсныг харуулж байгаа юм. Үүнтэй холбоотойгоор манай байгууллагын хөдөлмөрийн нөхцөлийн үнэлээ хийхэд шаардлагатай багаж тоног төхөөрөмжийн хүчин чадал, хүрэлцээ тааруу байсан. Ийм үед Жайка олон улсын байгууллагаас дээрх багаж тоног төхөөрөмжийн санхүүжилтийг шийдвэрлэж, өнөөдөр гардуулан өгч байгаад байгууллага, хамт олныхоо өмнөөс талархаж байгаагаа илэрхийлье. Цаг үеэ олсон чухал хөрөнгө оруулалт байлаа. Бидний цаашдын ажилд томоохон хувь нэмэр болно гэдэгт итгэлтэй байна” гэлээ.
Мөн Төслийн зохицуулагч Окүмацү Хидэки “Хөдөлмөр, нийгмийн хамгааллын яам, Хөдөлмөрийн аюулгүй байдал, эрүүл мэндийн төв нь Монгол Улсын хөдөлмөрийн аюулгүй байдал, эрүүл ахуйн салбарын гол хоёр байгууллага. Тэр утгаараа энэ хоёр байгууллагын үйл ажиллагаанд дэмжлэг үзүүлэх зорилгоор дээрх багаж тоног төхөөрөмжийг өгч байна. Тиймээс ажил хөдөлмөр эрхэлж буй олон мянган хүмүүсийн эрүүл аюулгүй орчинд ажиллах нөхцөл бололцоог ханган ажиллана гэдэгт итгэж байна” гэсэн юм.
